İravunk: "Paşinyan onun hakimiyyətini qoruyan əsas dayaqlar hesab olunan strukturlara şübhə ilə yanaşmağa başlayıb"
Hakimiyyət kulislərində yayılan söz-söhbətlərə görə, Nikol Paşinyan son vaxtlar indiyədək onun hakimiyyətini qoruyan əsas dayaqlar hesab olunan strukturlara şübhə ilə yanaşmağa başlayıb.
Bu barədə Crossmedia.az Ermənistanın "İravunk" nəşrinə istinadən xəbər verir ki, söhbət təbii olaraq Ermənistan Milli Təhlükəsizlik Xidmətindən (MTX) tutmuş polisə qədər hüquq-mühafizə sistemindən gedir.
Ermənistan MTX-nin keçmiş direktoru Armen Abazyanın gözlənilməz və qəfil şəkildə vəzifədən uzaqlaşdırılması, əslində, aylardır yığılıb qalmış dərin etimadsızlığın sadəcə görünən nəticəsidir.
"Bu etimadsızlıq daxili siyasi qeyri-müəyyənlik fonunda daha da dərinləşib. Paşinyanın narahatlığı əslində ilk baxışdan görünəndən daha dərindir. Onu ciddi şəkildə düşündürən bir sual var: "Görəsən, həlledici anda hüquq-mühafizə sistemi onu müdafiə etmək əvəzinə birdən-birə onun əleyhinə çevrilə bilərmi?". Yayılan fərziyyələrə görə, Paşinyan istisna etmir ki, həmin sistemin içərisində elə şəxslər var ki, münasib bir anda "yaxşı bir məbləğ" qarşılığında onun "vurun, döyün, asfalta uzadın" əmrlərinə tabe olmaqdan imtina edə bilərlər", - deyə nəşr bildirib.
22:25 18.07.2025
Oxunuş sayı: 7578
