Rumıniya Prezidenti ölkəsinin Moldova ilə birləşmək istədiyini ifadə edib
Rumıniya Prezidenti Nikuşor Dan Moldova ilə birləşməyə dəstəyini ifadə edib. O, bu barədə Almaniyanın nüfuzlu “Frankfurter Allgemeine Zeitung” nəşrinə verdiyi müsahibəsində danışıb.
Crossmedia.az xarici mediaya istinadən bildirir ki, Pezident Nikuşor Dan Moldova ilə birləşmə tərəfdarı olduğunu, lakin qonşu ölkənin vətəndaşlarının iradəsinə hörmətlə yanaşdığını bildirib. “Şəxsən mən Moldova ilə birləşmək arzusundayam, amma qonşu respublikanın vətəndaşlarının iradəsinə tam hörmət edirəm”, — deyə o qeyd edib.
Rumıniya Prezidenti hazırda Moldova vətəndaşlarının təxminən 35 faizinin bu ideyanı dəstəklədiyini də vurğulayıb. Onun sözlərinə görə, əhali arasında geniş konsensus olmadıqca, rəsmi Buxarest bu istiqamətdə hər hansı konkret addım atmağı planlaşdırmır. “Qonşu ölkə əhalisinin əhəmiyyətli bir hissəsi mövcud dövlət formasını dəstəklədiyi müddətcə Rumıniya heç bir addım atmayacaq”, — deyə Nikuşor Dan fikrini yekunlaşdırıb.
19:55 18.07.2025
Oxunuş sayı: 8126
