Meteo.az mobil tətbiqi istifadəyə verilib
Azərbaycanda faktiki və gözlənilən hava şəraiti ilə bağlı məlumatları operativ əldə etmək və izləmək məqsədilə Milli Hidrometeorologiya Xidməti tərəfindən meteo.az mobil tətbiqi test rejimində istifadəyə verilib.
Crossmedia.az xəbər verir ki, bunu Xidmətin rəsmisi Gülnarə Abbasova bildirib.
O qeyd edib ki, tətbiq vasitəsilə ölkə ərazisində mövcud və gözlənilən hava şəraiti, temperatur, küləyin sürəti və istiqaməti, atmosfer təzyiqi, rütubət eyni zamanda təhlükəli hava ilə bağlı xəbərdarlıqlar haqqında məlumatlar təqdim olunur. Tətbiqdə qısamüddətli proqnozlarla yanaşı, həftəlik hava proqnozları da göstərilir.
Xidmət rəsmisinin sözlərinə görə, “meteo.az” mobil tətbiqi hazırda IOS platforması üzərindən fəaliyyət göstərir, yaxın vaxtlarda “Android” versiyası da istifadəyə veriləcək.
Qeyd edək ki, hazırda test rejimində işləyən mobil tətbiqlə bağlı təklif və fikirlərinizi “tənzimləmələr” bölməsində “Bizə bildir” hissəsində və ya [email protected] poçt ünvanına yaza bilərsiniz.
12:16 07.11.2024
Oxunuş sayı: 14687
