ABŞ-də seçkilər: Demokratlar Senatda çoxluğu qazanıb
ABŞ Konqresinə keçirilən aralıq seçkilərin ilkin nəticələrinə əsasən, Demokratlar Partiyası Senatda çoxluğu təmin edir və Nümayəndələr Palatasında da üstünlük uğrunda mübarizəni davam etdirir.
Crossmedia.az xəbər verir ki, “Associated Press” agentliyinin noyabrın 4-də açıqladığı məlumatlara əsasən, demokratlar Senata nəzarəti ələ keçiriblər.
Moskva vaxtı ilə saat 08:10-a aid olduğu bildirilən ilkin hesablamalara görə, demokratlar Senatda 52, respublikaçılar isə 40 mandat əldə ediblər. Daha 8 yerin taleyi həmin vaxt müəyyənləşməmişdi.
Qeyd edək ki, 100 üzvlü Senatda çoxluq üçün ən azı 51 mandat tələb olunur.
Yayılan ilkin nəticələrdə demokratların Corciya, Şimali Karolina, Nyu-Hempşir, Cənubi Karolina, Nyu-Cersi, Massaçusets, Rod-Aylend, İllinoys, Delaver, Nyu-Meksiko, Kolorado, Virciniya, Texas, Oreqon, Ohayo, Kanzas, Ayova və Minnesota ştatlarında qələbə qazandığı bildirilir.
Respublikaçıların isə Florida, Qərbi Virciniya, Vayominq, Kentukki, Oklahoma, Arkanzas, Alabama, Tennessi və Cənubi Dakota ştatlarında üstünlük əldə etdiyi qeyd olunur.
Nümayəndələr Palatası üzrə təqdim edilən ilkin hesablamalarda demokratların 192, respublikaçıların isə 113 mandat qazandığı göstərilir. Daha 130 mandatın bölgüsü həmin mərhələdə müəyyənləşməmişdi.
435 üzvlü Nümayəndələr Palatasında çoxluq əldə etmək üçün 218 mandat lazımdır.
“Bloomberg”in proqnozuna görə, demokratlar respublikaçıların nəzarətində olan səkkiz mandatı qazana bilərlər.
Seçki nəticələrinin hesablanması davam etdiyindən ayrı-ayrı ştatlar və mandatlar üzrə göstəricilər dəyişə bilər.
09:36 04.11.2026
Oxunuş sayı: 63
