Paşinyanın Sünik səfəri zamanı baş verən insidentlə bağlı cinayət işi məhkəməyə göndərildi
Ermənistanda 2021-ci ilin aprelində baş nazirin Sünik (Zəngəzur – red.) bölgəsinə səfəri zamanı baş vermiş insidentlə bağlı başlanan xuliqanlıq işi üzrə ibtidai istintaq başa çatıb.
Crossmedia.az xarici mediaya istinadən bildirir ki, həmin dövrdə baş nazir Nikol Paşinyanın cənub bölgəsinə işgüzar səfəri zamanı yerli sakinlər onun gəlişinə etiraz edərək onu qeyri-etik ifadələrlə qarşılayıblar. Aksiya iştirakçıları Paşinyanı xəyanətdə ittiham ediblər və onun ünvanına təhqiramiz fikirlər səsləndiriblər.
Bundan sonra hadisə ilə bağlı xuliqanlıq maddəsi ilə cinayət işi açılıb. İbtidai istintaqın başa çatdığı və işin məhkəməyə göndərildiyi barədə Ermənistanın İstintaq Komitəsi məlumat yayıb.
Məlumata görə, iş üzrə dörd nəfər təqsirləndirilən şəxs qismində tanınıb. Onlardan üçü barəsində məhkəmə qərarı ilə girov və ölkəni tərk etməmək haqqında iltizam tədbiri seçilib. Dördüncü şəxsə isə yalnız ölkədən çıxmamaq barədə iltizam tədbiri tətbiq olunub.
Fatimə Nəbiyeva
12:50 07.07.2025
Oxunuş sayı: 8143
