Netanyahu: “Tramp ilə görüşümüz Qəzza razılaşmasına töhfə verəcək”
İsrailin Baş naziri Benyamin Netanyahu ABŞ-yə səfər etməzdən əvvəl Ben Qurion hava limanında jurnalistlərə açıqlama verib.
Crossmedia.az xarici mediaya istinadən xəbər verir ki, o, ABŞ prezidenti Donald Tramp ilə keçirəcəyi görüşün Qəzza zolağında mümkün atəşkəs razılaşmasına müsbət təsir göstərə biləcəyini deyib: “Sülh dairəsini xəyal edə biləcəyimizin çox daha o tərəfinə genişləndirmək imkanı var. Qəzzada 20 sağ, 30 ölü israilli əsir var və onların hamısını geri qaytarmaq üçün çalışırıq”.
Netanyahu bildirib ki, İsrailin atəşkəsə razılaşması üçün HƏMAS-ın hərbi imkanlarını tamamilə ortadan qaldırmaq zəruridir: “Qəbul etdiyimiz şərtlər çərçivəsində razılıq əldə etməyə çalışırıq. Müvafiq göstərişlərlə danışıqlar aparmaq üçün bir heyət göndərmişik. Tramp ilə görüşüm bu istiqamətdə irəliləyişə səbəb ola bilər”.
İsrailin dövlət televiziyası KAN Netanyahu ilə birlikdə səfərə onun oğlu Yair Netanyahu və qeyri-adi şəkildə ABŞnin İsraildəki səfiri Mayk Hakabi’nin də qatıldığını bildirib.
Netanyahu səfər çərçivəsində Donald Trampla yanaşı ABŞ-nin digər yüksək vəzifəli rəsmiləri ilə də görüşməlidir.
Qeyd edək ki, ABŞ Prezidenti Donald Tramp İsrailin Qəzza zolağında 60 günlük atəşkəs üçün lazım olan şərtləri qəbul etdiyini bəyan edib. Tramp bildirib ki, vasitəçi dövlətlər olan Qətər və Misir HƏMAS-a “son təklif”i təqdim edəcək.
HƏMAS isə İsraillə atəşkəs və əsir mübadiləsinə dair təklifə müsbət cavab verdiyini və razılaşmanın həyata keçirilməsi üçün danışıqlara hazır olduğunu açıqlayıb. Tel-Əviv rəhbərliyi isə HƏMAS-ın Qətər vasitəsilə irəli sürdüyü dəyişiklikləri qəbulolunmaz saydığını bəyan edib.
Mədinə Cəlilova
23:30 06.07.2025
Oxunuş sayı: 9101
