Putin: "BRİCS iqtisadi baxımdan G7-ni geridə qoyub"
Rusiya Prezidenti Vladimir Putin BRİCS-in iqtisadi göstəricilər baxımından G7 (Böyük Yeddilik) ölkələrini geridə qoyduğunu bildirib.
Crossmedia.az “TASS” istinadən xəbər verir ki, Putin bu fikri 6–7 iyulda Braziliyada keçirilən BRİCS Zirvə toplantısında videobağlantı vasitəsilə çıxışı zamanı səsləndirib. Onun sözlərinə görə, BRİCS ölkələri yalnız Yer kürəsinin üçdə birini və əhalisinin yarıya yaxın hissəsini deyil, həm də dünya iqtisadiyyatının 40%-ni təşkil edir.
“BVF-nin 2025-ci il üzrə məlumatlarına görə, BRİCS ölkələrinin ümumi ÜDM-i alıcılıq qabiliyyəti paritetinə görə 77 trilyon dollara çatıb. Müqayisə üçün qeyd edim ki, G7 ölkələrinin bu göstəricisi 57 trilyon dollardır. Yəni BRİCS bu göstəricidə bəzi digər birlikləri, o cümlədən G7-ni nəzərəçarpacaq dərəcədə qabaqlayır”, – deyə Putin bildirib.
O qeyd edib ki, BRİCS siyasi və təhlükəsizlik sahələri, iqtisadiyyat və maliyyə, eləcə də mədəni-humanitar mübadilələrdə əməkdaşlığı davam etdirir. İndi genişlənmiş BRİCS tərkibinə Avrasiya, Afrika, Yaxın Şərq və Latın Amerikasının aparıcı ölkələri daxildir və bu birlik “həqiqətən də böyük siyasi, iqtisadi, elmi-texniki və insan resurslarına” malikdir.
Putin çıxışında həmçinin Braziliya Prezidenti Luiz İnasio Lula da Silvaya və BRİCS-in Braziliya sədrliyinə strateji tərəfdaşlığın təşviqinə görə təşəkkürünü bildirib.
Qeyd edək ki, Braziliya bu il BRİCS-in növbəti Zirvə görüşünə ev sahibliyi edir.
Mədinə Cəlilova
22:15 06.07.2025
Oxunuş sayı: 7254
