ABŞ şirkətindən qalmaqallı plan: Fələstinlilərin sürgünü model edilib
ABŞ-nin “Boston Consulting Group” (BCG) məsləhət şirkətinin Qəzzadakı fələstinliləri sürgün etməyə yönəlmiş bir plan üzərində işlədiyi məlum olub.
Crossmedia.az “Financial Times” qəzetinin araşdırmasına əsasən xəbər verir ki, şirkət İsrail-ABŞ nəzarətində yaradılan Qəzza Humanitar Yardım Fondu (GHF) vasitəsilə BMT-nin yardım koordinasiya mexanizmini əvəzləməyi hədəfləyən planın hazırlanmasına və həyata keçirilməsinə yardım edib.
Bildirilir ki, bu çərçivədə bir neçə ay davam edən və dəyəri 4 milyon dollardan çox olan layihə üzrə bir düzindən çox BCG əməkdaşı çalışıb. Araşdırmada, BCG-nin müharibədən sonra Qəzzanın yenidən qurulması ilə bağlı yüz minlərlə fələstinlinin bölgədən çıxarılması üçün maliyyə modeli hazırladığı iddia olunur. Modelə əsasən, 500 min nəfərdən çox fələstinlinin adambaşı 9 min dollar dəyərində “yenidən yerləşdirmə paketi” ilə bölgədən çıxarılmasına və onların dörddə üçünün geri dönməyəcəyinə dair ssenari mövcuddur.
Ortaya çıxan sənədlər BCG-nin layihənin təhlükəsizlik aspektində də rol oynadığına dair suallar doğurub. Geniş ictimai tənqidlərdən sonra BCG rəsmi açıqlama verərək, GHF ilə əməkdaşlığın sonlandırıldığını, 30 may tarixində Qəzzaya dair təsdiqlənməmiş əlavə işlərin dayandırıldığını bildirib. Açıqlamada BCG-nin bu işlər üçün heç bir ödəniş almadığı və almayacağı qeyd olunub.
Şirkət layihə ilə bağlı daxili araşdırma başladıldığını və bu müddətdə layihəyə rəhbərlik edən menecerlərdən birinin inzibati məzuniyyətə göndərildiyini də açıqlayıb.
Qəzza Humanitar Yardım Fondu 27 may tarixində bölgədə fəaliyyətə başladığını və yardım yüklü yük maşınlarının yola çıxdığını elan etmişdi. İsrail ordusu isə biri şimalda, üçü cənubda olmaqla Qəzzada ümumilikdə dörd “yardım paylama mərkəzi” qurulduğunu bildirmişdi.
İsrail Qəzzanı kantonlara bölərək ərazinin 80 faizindən çoxunu fələstinlilər üçün qadağan olunmuş zona elan edib. Morag dəhlizi üzərində yerləşən iki yardım mərkəzinin fəaliyyətə başladığı açıqlanmışdı. Bu mərkəzlərdən yayılan görüntülər sosial şəbəkələrdə İkinci Dünya Müharibəsi dövründə nasist Almaniyasının toplama düşərgələrinə bənzədilib.
BMT-nin İnsan Hüquqları üzrə Ali Komissarlığı isə İsrail ordusunun bu yardım məntəqələrində ərzaq almağa çalışan azı 410 fələstinlini qətlə yetirdiyini bildirib.
Mədinə Cəlilova
21:50 06.07.2025
Oxunuş sayı: 8206
