Tarixdə bir ilk: Nüvə reaktorlarının istehsalında süni intellektdən istifadə başlanır
ABŞ-də iki texnologiya şirkəti nüvə obyektlərinin tikintisini sürətləndirmək məqsədilə süni intellekt platforması üzərində əməkdaşlığa başlayıb. Proyektin məqsədi nüvə reaktorlarının vaxtında və büdcəyə uyğun şəkildə inşasını təmin etməkdir.
Crossmedia.az xəbər verir ki, yazılım şirkəti “Palantir Technologies” nüvə reaktorlarının istehsalında inqilab yaradacağı bildirilən süni intellekt əsaslı proqram təminatını yaratmaq üçün “The Nuclear Company” ilə ortaq layihəyə başladığını elan edib. Şirkətlər bildirir ki, bu sistem xüsusi olaraq nüvə obyektlərinin daha səmərəli və planlı şəkildə tikintisinə xidmət edəcək ilk süni intellekt proqram təminatı olacaq.
Hazırda inkişaf etdirilən platforma Palantir-in “Warp Speed” adlı istehsalat idarəetmə sistemi təşəbbüsünün bir hissəsidir. Bu sistem materialların təchizat planlamasını təmin edir və istifadəçilərə məhsul xətlərini real vaxtda spesifik məhdudiyyətlərə və məqsədlərə uyğunlaşdıraraq daha sürətli şəkildə tənzimləmək imkanı verir.
Şirkətlər qeyd edir ki, sistem istehsalat komandalarına real vaxt rejimində uyğunlaşdırılmış, dəqiq və yenilənmiş təlimatlar təqdim etməklə layihələrin daha səmərəli və fasiləsiz həyata keçirilməsinə kömək edəcək. Bu da gecikmələrin qarşısını almaqla yanaşı, təchizat zəncirində izləmə və təsdiqləmə imkanı yaradacaq.
Yeni sistemin tətbiqi, göndəriş səhvlərinin, material çatışmazlıqlarının və sənəd itkilərinin qarşısını almaqla yanaşı, mümkün gecikmələr zamanı işlərin prioritetləşdirilməsinə və alternativ planların işə salınmasına imkan verəcək. Bu isə əlavə xərclərin qarşısının alınmasına şərait yaradacaq.
Mədinə Cəlilova
03:44 07.07.2025
Oxunuş sayı: 851
