Dünyada ilk dəfə bir balina ümumi narkozla əməliyyat olundu
ABŞ-nin Çikaqo şəhərində yerləşən su parkında dünya tarixində ilk dəfə olaraq bir beluqa (ağ) balinası ümumi narkoz altında əməliyyat edilib.
Su parkının rəhbərliyi bu əməliyyatı “dünyada bir ilk” adlandırıb və bu qədər iri canlıya narkoz verməyin yaratdığı çətinliklərə diqqət çəkib.
Crossmedia.az xarici KİV-ə istinadən xəbər verir ki, Kimolu adlı 12 yaşlı balinanın hava dəliklərinə yaxın nahiyələrdə böyüyən kistlərin çıxarılması üçün əməliyyat zəruri hesab edilib. Baytarlar əməliyyatı aparmaq üçün bir sıra mütəxəssislərlə məsləhətləşiblər. Əməliyyat zamanı ən böyük risk balinanın narkozdan ayılmaması olub.
Əməliyyat boyu baytar və baxıcı heyəti böyük narahatlıqla prosesi izləyib. Əməliyyatdan sonra Kimolu doğulduğu gündən ona qulluq edən baxıcılarının səsləri ilə oyadılıb. Onun ayılması üçün digər ağ balinaların səslərindən də istifadə olunub.
Balina özünə gəldikdən sonra hovuzuna buraxılıb və üzə bilib-bilməyəcəyi maraqla gözlənilib. Həmin anları baytarlar və baxıcılar nəfəs tutaraq müşahidə ediblər. Kimoludan çıxarılan kistlər laboratoriyada araşdırmaya göndərilib.
Çikaqodakı su parkı bu əməliyyatda əldə olunan təcrübəni digər ölkələrdəki baytarlarla da paylaşmağı planlaşdırır.
Mədinə Cəlilova
00:55 07.07.2025
Oxunuş sayı: 726
