Müxalifət Albanesenin ABŞ-yə “ağ bayraq” göstərdiyini bildirir
Avstraliyanın Baş naziri Entoni Albanese ABŞ-nin idxal rüsumları ilə bağlı qərarı ərəfəsində güzəşt əldə olunacağına ümid etmədiyini açıqlayıb. Bu bəyanat müxalifət tərəfindən “Vaşinqtona ağ bayraq göstərmək” kimi qiymətləndirilib.
Crossmedia.az xarici mediaya istinadən bildirir ki, ABŞ prezidenti Donald Trampın “Azadlıq Günü” adı verdiyi rüsum qərarlarının 90 günlük dayandırılması müddəti bu çərşənbə günü başa çatır. Hazırda Avstraliya məhsulları 10 faiz ümumi gömrük rüsumlarına tabedir. Polad və alüminium məhsullarına isə bu göstərici 50 faizə qədər yüksəlir.
Entoni Albanese bu həftə News Corp sammitində çıxışı zamanı bu rüsumların dəyişəcəyini gözləmədiyini bildirib. Onun bu açıqlaması müxalifətin kəskin tənqidinə səbəb olub.
Müxalifətin ticarət üzrə sözçüsü Kevin Hogan bazar günü bildirib ki, baş nazirin ABŞ-nin qərarını qabaqlayaraq bədbin proqnoz verməsi anlaşılmazdır. Onun sözlərinə görə, belə mövqe ölkənin maraqlarına ziddir və danışıqlar imkanlarını zəiflədir.
O əlavə edib ki, hökumət bu məsələdə daha sərt mövqe sərgiləməli və Avstraliya ixracatçılarının maraqlarını qorumalıdır. Hogan baş nazirin diplomatik təzyiq mexanizmlərindən istifadə etməli olduğunu vurğulayıb.
Fatimə Nəbiyeva
11:36 06.07.2025
Oxunuş sayı: 922
