Təl-Əvivdə Qəzzada girov saxlanılanların azadlığı tələbi ilə mitinq keçirilib
Təl-Əviv küçələrində minlərlə insan Qəzzada atəşkəs və HƏMAS-ın saxladığı girovların azad olunmasını tələb edərək aksiya keçirib. Mitinq zamanı etirazçılar “Onları evə qaytarın” yazılan plakatlarla İsrail hökumətinə çağırış ediblər.
Crossmedia.az xarici mediaya istinadən bildirir ki, etirazların baş verdiyi saatlarda İsrailin təhlükəsizlik kabinetinin toplanaraq HƏMAS-ın ABŞ vasitəçiliyi ilə təqdim olunan mümkün atəşkəs və girov mübadiləsi təklifinə verdiyi cavabı müzakirə etdiyi bildirilir. İsrail mediasının məlumatına görə, hökumət Qətərə nümayəndə heyəti göndərmək qərarı verib. Məqsəd girovların azad olunmasına dair HƏMAS-la danışıqlar aparmaqdır.
Məlumata əsasən, HƏMAS cümə günü ABŞ-nin son təklifinə “müsbət” cavab verdiyini açıqlayıb. Lakin təşkilat razılaşmanın detallarının və icrasının hələlik dəqiqləşdirilmədiyini bildirib. ABŞ Prezidenti Donald Trampın 60 günlük atəşkəslə bağlı təklifi HƏMAS tərəfindən qəbul edilib-edilmədiyi isə dəqiq deyil. HƏMAS bəyan edib ki, atəşkəsin yalnız müvəqqəti deyil, daimi olması ilə bağlı zəmanət tələb edir.
ABŞ Prezidenti Donald Tramp tərəfləri razılığa gətirmək üçün fəal səylər göstərir. İsrailin Baş naziri Benyamin Netanyahu gələn həftə bu məsələni müzakirə etmək üçün Ağ Evdə Trampla görüşəcək.
Qeyd edək ki, münaqişə 7 oktyabr 2023-cü il tarixində HƏMAS-ın İsrailə hücumu ilə başlayıb. Həmin hücum nəticəsində 1 200 nəfər həlak olub, 251 nəfər girov götürülüb. Hazırda onlardan təxminən 50 nəfərin hələ də Qəzzada saxlanıldığı bildirilir. Cavab olaraq İsrailin həyata keçirdiyi hərbi əməliyyatlarda Qəzzə Səhiyyə Nazirliyinin məlumatına görə, 57 minə yaxın fələstinli həyatını itirib. Onların yarıdan çoxunu qadın və uşaqlar təşkil edir.
Fatimə Nəbiyeva
08:04 06.07.2025
Oxunuş sayı: 7538
