Kosova parlamentinə bomba həyəcanı bina təxliyə edildi
Kosova parlamentində bomba olduğu barədə məlumat daxil olduqdan sonra bina təxliyə edilib, parlamentin ümumi iclası isə təxirə salınıb.
Aprelin 15-dən etibarən parlament sədrinin seçilə bilməməsi səbəbindən hər iki gündən bir davam etdirilən iclasın bu gün 42-ci dəfə keçirilməsi planlaşdırılırdı. Səhər saatlarında deputatlar binaya daxil olduqdan sonra təhlükəsizlik qüvvələri tərəfindən bomba həyəcanı ilə təxliyə prosesi başladılıb.
Crossmedia.az xarici KİV-ə istinadən xəbər verir ki, Kosova Polisi hadisə ilə bağlı verdiyi açıqlamada bildirib ki, prokurorluq məlumatlandırılıb və minaların zərərsizləşdirilməsi üzrə mütəxəssislər də daxil olmaqla xüsusi qruplar binada araşdırma aparır.
Parlamentin Baş katibinin səlahiyyətlərini icra edən Arben Loşi yerli mediaya açıqlamasında qeyd edib ki, “ingilis dilində danışan bir şəxs parlament binasına bomba yerləşdirildiyini və onun 10 dəqiqə ərzində partlayacağını deyib.”
Kosova Gələcək Naminə Alyans Partiyasının deputatı Tayme Kadrijay hadisəyə sərt reaksiya verərək deyib: “Baş verənlər tamamilə mənasızdır. Ola bilər ki, bu, deputatları parlamentdən uzaqlaşdırmaq məqsədi ilə edilmiş qəsdən bir zəngdir. Parlamentə hücum edən şəxs normal biri ola bilməz.”
Hadisədən sonra parlamentin iclası yerli vaxtla saat 20:00-a qədər təxirə salınıb.
Qeyd edək ki, Kosova Prezidentinin Ofisi də parlament binasında yerləşir.
Mədinə Cəlilova
23:35 05.07.2025
Oxunuş sayı: 967
