Britaniya mətbuatından Rusiyaya qarşı iddia: "Tikintiyə gedən kubalılar müharibəyə göndərilir"
Kuba vətəndaşları Rusiya ərazisində yüksək maaşlı tikinti işlərinə cəlb ediləcəklərinə inanaraq ölkəyə gətirilib, lakin Ukrayna cəbhəsinə göndərilib.
Crossmedia.az xəbər verir ki, bu barədə “Daily Mail” qəzetinə danışan 37 yaşlı kubalı Francisco Qarsia bildirib. Sosial mediada gördüyü iş elanı ilə Moskvaya uçduqdan dərhal sonra aldadıldığını anlayıb.
Qarsia deyib ki, hava limanında hərbi geyimli şəxslər tərəfindən qarşılanıb, hərbi maşınlara mindirilib, ardınca zorla əsgərlik sənədlərinə imza atdırılıb. O və digər kubalılar 30 gün ərzində hərbi təlim keçdikdən sonra heç bir xəbərdarlıq edilmədən cəbhəyə göndərilib.
O, bir il ərzində Rostov, Donetsk və Soledarda döyüşdüyünü, iki dəfə yaralandığını, rus əsgərləri tərəfindən tərk edildiyini və sağ qalmaq üçün ölkədən qaçdığını bildirib. Qarsia hazırda Yunanıstanın paytaxtı Afinada çadırda yaşayır.
İddialara görə, fevral 2022-dən bəri 20 minə yaxın kubalı Rusiya tərəfindən müharibəyə cəlb olunub. Hazırda isə təxminən 7 min kubalının Ukrayna cəbhəsində olduğu bildirilir.
Mədinə Cəlilova
21:50 05.07.2025
Oxunuş sayı: 1040
