Cənubi Koreya “Cheonryong” qanadlı raketinin ilk uçuş sınağını keçirib
Cənubi Koreyanın Müdafiə Satınalmaları Proqramları Agentliyi (DAPA) iyunun 23-də yerli istehsal olan “Cheonryong” (KALCM) qanadlı raketinin ilk uçuş sınağının uğurla həyata keçirildiyini açıqlayıb. Raket FA-50 tipli təlim-döyüş təyyarəsindən buraxılıb.
Crossmedia.az Koreya mətbuatına istinadən xəbər verir ki, raketin inkişafına 2018-ci ildən etibarən başlanılıb. Layihəyə Cənubi Koreyanın Müdafiə İnkişafları Agentliyi (ADD), LIG Nex1 (LG qrupuna daxil) və Hanwha Aerospace (Hanwha qrupuna daxil) şirkətləri cəlb olunub. Hanwha Aerospace raketə inteqrasiya olunmuş turbo-reaktiv mühərrikin istehsalçısıdır.
Ekspertlər bildirirlər ki, raketin prototipi kimi hazırda Cənubi Koreya Hərbi Hava Qüvvələrinin arsenalında yer alan Taurus KEPD 350 qanadlı raketindən istifadə olunub. “Cheonryong” raketinin 500–800 kilometr uçuş məsafəsinə və tandem tipli, maneələri dəlib keçə bilən döyüş başlığına malik olduğu qeyd edilir.
Raketin gələcəkdə əsasən Cənubi Koreyanın istehsal etdiyi beşinci nəsil KAI KF-21 “Boramae” qırıcı təyyarəsinə inteqrasiya edilməsi planlaşdırılır. Bu layihə Cənubi Koreyanın müdafiə sənayesində strateji aviasiya imkanlarını gücləndirmək istiqamətində atılmış mühüm addım hesab olunur.
21:20 05.07.2025
Oxunuş sayı: 1947
