Yanlış alarm İspaniyada təlaş yaratdı: Sərnişinlər təyyarənin qanadından tullandı, 18 nəfər yaralandı
İspaniyanın Mayorka adasında yerləşən Palma Hava Limanında Ryanair aviaşirkətinə məxsus, İngiltərənin Mançester şəhərinə uçmağa hazırlaşan sərnişin təyyarəsində səhvən yanğın siqnalı verilib. Siqnalın yanlış olmasına baxmayaraq, təyyarədə panika yaşanıb və sərnişinlər təcili şəkildə təyyarəni tərk etməyə çalışıblar.
Bəzi sərnişinlərin təyyarənin qanadına çıxaraq oradan yerə atladığı görüntülər sosial şəbəkələrdə yayılıb.
Crossmedia.az xarici mediaya istinadən xəbər verir ki, hadisə nəticəsində 18 nəfərin yüngül xəsarət aldığı, altı nəfərin xəstəxanaya yerləşdirildiyi bildirilib. Onlardan üçü Palma şəhərindəki Clínica Rotger, digərləri isə Quironsalud Palmplanas xəstəxanasında müalicə alıb.
Sosial mediada yayılan bir videoda hava limanı əməkdaşlarından birinin qarışıq vəziyyətdə başqa bir işçiyə belə dediyi eşidilir: “Təyyarə qalxmaq üzrə idi, indi isə insanlar qanadından yerə atlayır. Nəsə baş verir, təyyarəni təxliyə edirlər”.
Ryanair şirkəti hadisə ilə bağlı açıqlama yayaraq, təyyarədəki yanğın xəbərdarlığının texniki nasazlıq səbəbilə yanlış verildiyini təsdiqləyib. Sərnişinlərin əksəriyyəti təyyarədən nizamlı şəkildə çıxarılıb. Hadisə nəticəsində ləngiyən reysin başqa bir təyyarə ilə yerli saatla 07:05-də Palma şəhərindən havaya qalxdığı, sərnişinlərdən isə yaşananlar üçün üzr istənildiyi bildirilib.
Mədinə Cəlilova
01:00 06.07.2025
Oxunuş sayı: 8811
