1923-cü ildən bəri bir ilk: Yasaq ləğv olundu, Sena çayı ictimaiyyətə açıldı
Fransanın paytaxtı Parisdə yerləşən Sena çayı 1923-cü ildən bəri ilk dəfə ictimaiyyətin istifadəsinə açılıb. 100 ildən artıq davam edən üzmə qadağasının aradan qaldırılması ilə çayda xüsusi olaraq ayrılmış üç bölgədə insanlar üzə biləcəklər.
2024-cü il Paris Yay Olimpiya Oyunları zamanı peşəkar üzgüçülər də xüsusi şəkildə təmizlənmiş Sena çayında yarışlara qatılmışdılar.
Crossmedia.az xəbər verir ki, BBC-nin xəbərinə görə, bu gün yerli saatla 08:00-da (Bakı vaxtı ilə 09:00) çox sayda insan üzmək üçün çaya daxil olub.
Paris sakinləri üçün ayrılmış üzgüçülük bölgələrinin biri şəhərin simvollarından sayılan Eyfel qülləsinin yaxınlığında, digəri isə məşhur Notr-Dam kilsəsinin ətrafında yerləşir. Üçüncü üzgüçülük nöqtəsi isə şəhərin şərq hissəsində yerləşir.
Bu ərazilərdə insanların rahatlığı üçün soyunma kabinələri və 300-ə yaxın insanın istifadə edə biləcəyi çimərlik tərzində mebellər quraşdırılıb. Üç üzgüçülük nöqtəsi avqust ayının sonuna qədər 10 və ya 14 yaşdan yuxarı olan şəxslər üçün müəyyən olunmuş saatlarda ödənişsiz şəkildə istifadəyə veriləcək. Ərazilərdə eyni zamanda xilasedicilər də xidmət göstərəcək.
Sena çayında üzmə qadağasının qaldırılması təşəbbüsü ilk dəfə 1988-ci ildə irəli sürülüb. Həmin dövrdə Parisin meri və gələcəkdə Fransa prezidenti olan Jak Şirak bu qadağanın ləğvini müdafiə etmişdi. Son 20 ildə görülən işlər nəticəsində nəcis mənşəli bakteriyaların çaya axıdılmasının qarşısı xeyli dərəcədə alınıb. Qadağanın əsas səbəbi isə çaydakı suyun insan sağlamlığı üçün təhlükəli dərəcədə çirklənmiş olması idi.
Ötən il keçirilən Olimpiya Oyunlarından əvvəl Sena çayının təmizlənməsi üçün 1,4 milyard avrodan çox sərmayə qoyulmuşdu. Olimpiadanın açılış mərasimi də məhz çay üzərində təşkil olunmuşdu. Lakin suyun üzgüçülər üçün kifayət qədər təmiz və təhlükəsiz olması ilə bağlı şübhələr yarışlar zamanı da davam etmişdi. Təşkilatçılar çaydakı kirliliyin əsas səbəbi kimi yağan yağışları göstərmişdi. Olimpiadadan əvvəl, 2024-cü ilin iyul ayında Paris meri Ann İdalqo da çayda üzərək Sena çayının təmizliyini sübut etməyə çalışmışdı.
Mədinə Cəlilova
03:00 06.07.2025
Oxunuş sayı: 1982
