Rusiyadan ABŞ-yə jest: ““Talliban”ı tanıması o deməkdir ki…”
Rusiyanın Əfqanıstandakı “Taliban” rejimini rəsmi olaraq tanıması beynəlxalq münasibətlər sistemində mühüm və eyni zamanda mübahisəli bir addım kimi qiymətləndirilir. Bu qərar Moskvanın regionda artan təsirini gücləndirmə cəhdi olmaqla yanaşı, həm də Qərblə ziddiyyətli maraqlar fonunda həyata keçirilmiş strateji bir gedişdir. Rusiya “Taliban”ın Əfqanıstanda faktiki hakimiyyətini tanımaqla regional təhlükəsizlik, iqtisadi əməkdaşlıq və geosiyasi nüfuz dairəsini genişləndirməyə çalışır. Bu addım həm regional aktorlar, həm də beynəlxalq ictimaiyyət üçün yeni suallar və çağırışlar doğurur.
Mövzu ilə bağlı siyasi şərhçi Kənan Novruzov Crossmedia.az-a açıqlama verib: "Ümumiyyətlə, bir neçə il əvvəl Əfqanıstanda hakimiyyət dəyişəndə bu proses ABŞ-nin Rusiyaya qarşı təsir vasitəsi idi. “Taliban”ın hakimiyyətə gəlməsi Rusiyanın ciddi narahat eləməyə başlamışdı və sanki bu ölkəyə qarşı “saatlı bomba” hazırlanmışdı. Proseslər əslində başqa məcra ilə də inkişaf edə bilərdi, Taliblər Rusiyaya qarşı ciddi addımlar da ata bilərdirlər. Lakin onlar özbaşına deyil və ABŞ-yə tabedir. Çoxları gözləyirdi ki, Taliblərin hakimiyyəti qısa olacaq və devriləcək. Lakin möhkəmlənərək hakimiyyətdə qaldılar. İndiki anda Rusiyanın “Taliban”ı tanıması da təsadüfi deyil. Bu Rusiya-ABŞ xəttində baş verənlərlə bağlıdır. ABŞ-də Donald Tramp hakimiyyətə gələndən sonra Vaşinqton və Moskva arasındakı “sərin küləklər” aradan qalxmağa başlayıb. Hətta indi ABŞ-nin Rusiya ilə münasibətləri daha yaxşıdır, nəinki Avropa ilə. ABŞ Prezidenti Donald Trampla rusiyalı həmkarı Vladimir Putin çox yaxşı anlaşırlar və diplomatik ticarət edirlər. Belə olan halda Rusiyanın “Taliban”ı tanıyan ilk dövlət olması əslində təsadüfi deyil. Perspektivdə Rusiya ilə “Taliban” arasındakı münasibətlər inkişaf edəcək. Nəinki diplomatik, siyasi-iqtisadi münasibətlər də inkişaf edə bilər. Mümkündür ki, bu, “pərdəarxasında” baş verən hansısa danışıqların nəticəsidir”.
Ayhan
18:40 05.07.2025
Oxunuş sayı: 4781
