Qəzzada Humanitar yardım fondunun iki amerikalı yardım işçisi yaralanıb
Qəzza Humanitar Fondu (GHF) iki amerikalı yardım işçisinin Qəzzada qranat hücumu nəticəsində xəsarət aldığını açıqlayıb. GHF-nin yaydığı məlumata görə, xəsarət alan şəxslər qeyri-ölümcül yaralarla xəstəxanaya yerləşdirilib və vəziyyətləri stabildir.
Crossmedia.az xarici mediaya istinadən bildirir ki, hücum ərzaq paylama məntəqəsində iki hücumçunun iki ədəd qumbara atması ilə baş verib. Hadisənin kim tərəfindən törədildiyi hələlik məlum deyil. İsrail ordusu sonradan yaydığı açıqlamada “terrorçu qruplaşmaları” Qəzzada yardım bölgüsünü sabotajda ittiham edib. May ayından Qəzzada yardım paylamağa başlayan GHF bölgədəki təhlükəsizliyi təmin etmək üçün özəl amerikalı hərbi mühafizəçilərdən istifadə edir.
Qəzza Səhiyyə Nazirliyi son 24 saat ərzində İsrail ordusunun əməliyyatları nəticəsində azı 70 nəfərin həlak olduğunu, onlardan 23-nün yardım bölgüsü məntəqələrinin yaxınlığında öldüyünü bildirib. İsrail ordusu bu açıqlamalara münasibət bildirməyib, lakin son bir həftədə 100 döyüşçünü zərərsizləşdirdiklərini və Qəzzanın 65%-nə nəzarət etdiklərini qeyd edib.
Qəzzada gərginlik davam edərkən ABŞ-nin vasitəçiliyi ilə atəşkəsə dair razılaşma cəhdləri aparılır. HƏMAS cümə günü bu təşəbbüsə müsbət yanaşdığını açıqlayıb. ABŞ Prezidenti Donald Trampın bazar ertəsi İsrail Baş naziri Benyamin Netanyahu ilə görüşəcəyi gözlənilir.
GHF son beş həftədə fələstinlilərə 52 milyondan çox yemək payladığını açıqlasa da, təşkilatın BMT kimi ənənəvi yardım kanallarını kənarda saxlaması tənqid olunur. BMT GHF-nin neytral və qərəzsiz olmadığını bildirir. Qəzzada 11 həftəlik yardım blokadası mayın 19-da aradan qaldırıldıqdan sonra, BMT-yə görə, yardım almağa çalışan 400-dən çox fələstinli öldürülüb.
Fatimə Nəbiyeva
18:23 05.07.2025
Oxunuş sayı: 7277
