Paşinyan: Ermənistana yeni Konstitusiya lazımdır
Ermənistanın Baş naziri Nikol Paşinyan Konstitusiya Günü münasibətilə çıxışında ölkəyə yeni Konstitusiyanın lazım olduğunu bir daha vurğulayıb.
Crossmedia.az xəbər verir ki, bu barədə erməni mediası məlumat yayıb.
“Ermənistan xalq səsverməsi ilə təsdiqlənmiş yeni Konstitusiyaya ehtiyac duyur. Elə bir Konstitusiyaya ki, xalq onu özünün hesab etsin, doğma saysın. Elə bir həyat qaydasına ki, onu xalq özü öz Vətən-dövlətində yaşamaq üçün müəyyənləşdirsin”, – deyə Paşinyan Konstitusiyanın qəbulunun 30 illiyi münasibətilə keçirilən tədbirdə bildirib.
Qeyd edək ki, bir müddət əvvəl Ermənistanın ədliyyə naziri Srbui Qalyan Konstitusiyanın yeni mətninin 10 ay ərzində hazır ola biləcəyini açıqlamışdı. Lakin o, sənədin hazırlanma müddətinin müzakirələrin gedişindən asılı olduğunu da əlavə edib. Onun sözlərinə görə, Konstitusiya islahatları üzrə Şuranın uzun fasilədən sonra ilk iclası iki həftə ərzində keçiriləcək.
Fatimə Məmmədova
17:25 05.07.2025
Oxunuş sayı: 8411
