Ersin Tatar Azərbaycana təşəkkür etdi
Şimali Kipr Türk Cümhuriyyətinin (ŞKTC) Prezidenti Ersin Tatar Azərbaycan Prezidenti İlham Əliyevə və Azərbaycan xalqına ŞKTC-yə göstərilən xüsusi diqqət və dəstəyə görə təşəkkürünü bildirib.
Crossmedia.az xəbər verir ki, bu barədə CNN Türk məlumat verib.
Bu barədə o, Xankəndidə keçirilən İqtisadi Əməkdaşlıq Təşkilatının (İƏT) 17-ci Zirvə Toplantısından sonra keçirdiyi mətbuat konfransında danışıb.
“Azərbaycan və Türkiyəyə Lefkoşanın türk dövlətləri ilə əlaqələrinin möhkəmlənməsi, eləcə də ədalətsiz sanksiya və embarqoların aradan qaldırılması istiqamətindəki töhfələrinə görə minnətdarıq. Xüsusilə Azərbaycanla münasibətlərin hərtərəfli inkişafı bizi məmnun edir”, deyə o qeyd edib.
Tatar bildirib ki, Xankəndidə keçirilən İƏT Zirvəsi dünya ictimaiyyətində ŞKTC ilə bağlı məlumatlılığı artırıb. Onun sözlərinə görə, bu, İƏT çərçivəsində ilk dəfə belə yüksək səviyyədə iştirak etmələri ilə tarixə düşüb.
“Sammit zalında digər dövlətlərin bayraqları ilə yanaşı Şimali Kipr Türk Cümhuriyyətinin bayrağının da asılması Lefkoşanın dialoq tərəfdaşı kimi qəbul edildiyinin göstəricisidir”, deyə o vurğulayıb.
Ersin Tatar, həmçinin, İƏT ölkələri ilə gələcəkdə əlaqələrin daha da genişlənəcəyinə ümid etdiyini bildirib.
Nigar Rəhimova
17:12 05.07.2025
Oxunuş sayı: 4173
