Türkiyədə Bələdiyyə sədrləri həbs edildi -əməliyyatlar davam edir
Adana Böyükşəhər Bələdiyyəsinin sədri Zeydan Karalar və Adıyaman Bələdiyyəsinin sədri Abdurrahman Tutdere barəsində həbs qərarı çıxarılıb və hər iki şəxs hüquq-mühafizə orqanları tərəfindən saxlanılıb.
Crossmedia.az xəbər verir ki, İstanbul Cümhuriyyət Baş Prokurorluğu tərəfindən, İhsan Aktaşın rəhbərlik etdiyi iddia olunan mütəşəkkil cinayətkar qruplaşmanın bəzi bələdiyyə başçıları və bələdiyyələrin yüksək vəzifəli şəxslərinə rüşvət verməklə tender proseslərini öz maraqları istiqamətində yönəltməsi ilə bağlı genişmiqyaslı istintaq davam etdirilir.
Aparılan araşdırmalar nəticəsində Adana Böyükşəhər Bələdiyyəsinin sədri Zeydan Karalar və Adıyaman Bələdiyyəsinin sədri Abdurrahman Tutdere barəsində həbs qərarı çıxarılmış və hər iki şəxs hüquq-mühafizə orqanları tərəfindən saxlanılmışdır. Saxlanılmadan dərhal sonra Adana Təhlükəsizlik İdarəsinin əməkdaşları Adana Böyükşəhər Bələdiyyəsinin inzibati binasında axtarışlara başlamışdır.
Bələdiyyə binasının qarşısında və ətrafında ciddi təhlükəsizlik tədbirləri görülmüş, ictimai asayişin təmin olunması məqsədilə polis qüvvələri səfərbər edilmişdir. Bənzər şəkildə, Adıyaman Bələdiyyəsinə gələn hüquq-mühafizə orqanları da binanın daxilində və ətrafında təhlükəsizlik tədbirlərini gücləndirmiş və inzibati binada axtarış aparmışlar.
Bələdiyyəyə daxil olmaq istəyən bəzi vəzifəli şəxslər şəxsiyyət vəsiqələri yoxlanıldıqdan və polis müşayiəti ilə müşahidə altına alındıqdan sonra binaya buraxılmışdır.
Hazırda Adana və Adıyaman bələdiyyələrində hüquq-mühafizə orqanlarının əməliyyat-axtarış tədbirləri davam etdirilir.
13:55 05.07.2025
Oxunuş sayı: 9149
