Niderland: Rusiya Ukraynada kimyəvi silahlardan istifadəni artırıb
Niderland Müdafiə Naziri Ruben Brekelmans və Hərbi Kəşfiyyat Xidmətinin rəhbəri Peter Reesink, Rusiyanın Ukraynada qadağan olunmuş kimyəvi silahlardan geniş şəkildə istifadə etdiyinə dair sübutlara malik olduqlarını açıqlayıb. Onların bildirdiyinə görə, bu silahların arasında əsgərləri səngərlərdən çıxmağa məcbur edib hədəf almaq üçün istifadə olunan boğucu maddələr də var və bu maddələrin pilotsuz uçuş aparatları vasitəsilə atıldığı iddia edilir.
Crossmedia.az xəbər verir ki, Brekelmans “Reuters”- ə verdiyi açıqlamada, Rusiyanın kimyəvi silahlardan istifadəsinin getdikcə intensivləşdiyini və bunun artıq “normal və geniş yayılmış bir üsula” çevrildiyini bildirib. Nazir, Rusiyaya qarşı daha sərt sanksiyaların tətbiq olunmasına çağırıb.
Niderland kəşfiyyatının əldə etdiyi sübutlara əsasən, Rusiyanın Birinci Dünya Müharibəsində Almaniya tərəfindən istifadə edilən və hazırda qadağan olunmuş “xloropikrin” maddəsindən istifadə etdiyi ehtimal olunur. Məlumata görə, bu maddə də daxil olmaqla, istifadə olunan kimyəvi silahlarla əlaqəli simptomlar 2.500-dən çox yaralıda müşahidə edilib və ən azı üç nəfərin ölümü bu səbəblə əlaqələndirilib.
Reesink, bu nəticələrin Niderland hərbi kəşfiyyatının öz araşdırmalarına əsaslandığını bildirib. Onun sözlərinə görə, Rusiya silahlı qüvvələrinin kimyəvi silah istifadəsi “demək olar ki, sistematik prosedura” çevrilib. Reesink əlavə edib ki, bu silahların istifadəsi improvizə olunmuş sursatlarla – məsələn, xloropikrinlə doldurulmuş ampulalar və pilotsuz uçuş aparatlarından asılmış qablarla həyata keçirilir.
Xloropikrin maddəsi OPCW (Kimyəvi Silahların Qadağan Edilməsi Təşkilatı) tərəfindən qadağan olunmuş boğucu maddələr siyahısına daxildir və dəridə, gözlərdə və tənəffüs yollarında ciddi qıcıqlanmaya səbəb olur. Yüksək dozada qəbul edildikdə isə öldürücü ola bilər.
Almaniyanın xarici kəşfiyyat xidməti BND də Rusiyanın Ukraynada kimyəvi silah istifadəsini artırdığına dair oxşar məlumat yayıb. BND, Rusiyanın təkcə gözyaşardıcı qaz deyil, daha təhlükəli olan xloropikrindən də istifadə etdiyini və bu maddənin qapalı məkanlarda yüksək dozada həyati təhlükə yaratdığını bildirib.
Kimyəvi Silahlar Sazişinə görə, belə maddələrin istənilən şəraitdə istifadəsi qəti qadağandır və BND bunu həmin sazişin ciddi pozuntusu kimi dəyərləndirib.
Rusiya tərəfi bu xəbərlə bağlı hələlik rəsmi açıqlama verməyib. Daha əvvəl isə bu cür iddiaları təkzib edərək eyni ittihamları Ukraynaya yönəltmişdi. Rusiya Xarici İşlər Nazirliyinin sözçüsü Mariya Zaxarova bu həftə bildirib ki, ölkənin şərqində xloropikrinlə doldurulmuş partlayıcılar ələ keçirilib.
Kimyəvi Silahların Qadağan Edilməsi Təşkilatı ötən il hər iki tərəfin qarşılıqlı ittihamlarının “yetərincə əsaslandırılmadığını” bəyan etmiş və məsələyə dair rəsmi istintaq tələb olunmamışdı.
Niderland hökumətinin əldə etdiyi kəşfiyyat məlumatlarının bu həftə parlamentə təqdim ediləcəyi gözlənilir.
Mədinə Cəlilova
04:00 05.07.2025
Oxunuş sayı: 820
