Tramp-Putin danışıqlarından sonra Rusiya Kiyevə ən böyük dron hücumunu həyata keçirdi
Rusiya Kiyevə müharibə başlayandan bəri ən böyük dron hücumunu həyata keçirib. Nəticədə 1 nəfər həlak olub, azı 23 nəfər yaralanıb. Hücum ABŞ prezidenti Donald Trampın Rusiya prezidenti Vladimir Putinlə telefon danışığından bir neçə saat sonra baş verib.
Crossmedia.az xarici mediaya istinadən bildirir ki, Ukrayna Hərbi Hava Qüvvələri Rusiya tərəfindən 539 dron və 11 raketin buraxıldığını açıqlayıb. Gecədən səhərə qədər davam edən hücum zamanı hava həyəcan siqnalları səslənib, insanlar metro stansiyalarında sığınacaq axtarıb.
Kiyev hərbi administrasiyası bildirir ki, zərbələr nəticəsində şəhərin 6 rayonunda ümumilikdə 40-a yaxın yaşayış binası, 5 məktəb və bağça, dəmir yolu infrastrukturu, kafe və avtomobillər zədələnib. Polşanın Kiyevdəki səfirliyinin konsulluq bölməsi də zərər görüb.
Ukrayna Prezidenti Volodimir Zelenski hücumu “kütləvi və qəsdən həyata keçirilmiş, cəsarətsiz bir hücum” adlandırıb. O, sonradan Trampla telefon danışığı apararaq birgə hava hücumundan müdafiə və silah istehsal imkanlarını müzakirə etdiklərini bildirib.
Rusiya Müdafiə Nazirliyi hücumların “dron zavodları, hərbi hava limanı və neft emalı zavodu” kimi hədəfləri vurmaq üçün edildiyini açıqlasa da, Ukrayna bu barədə hərbi məqsədlərə dair açıqlama verməyib. Zelenski isə Moskvaya qarşı sanksiyaların gücləndirilməsinə çağırıb.
Fatimə Nəbiyeva
19:26 04.07.2025
Oxunuş sayı: 9465
