HƏMAS İsraillə atəşkəs təklifinə müsbət cavab verib
Fələstinli HƏMAS hərəkatı İsraillə atəşkəsə dair təklifə müsbət cavab verib. Bu barədə Crossmedia.az İsrailin Ynet xəbər portalına istinadən bildirir ki, HƏMAS-ın bu qərarı barədə yaxın saatlarda rəsmi açıqlama veriləcəyi gözlənilir. Bildirildiyinə görə, qərar vasitəçilərə təqdim olunub və atəşkəs razılaşmasının detallarının üzərində razılaşma əldə olunması üçün növbəti mərhələyə keçid gözlənilir.
Qeyd edək ki, HƏMAS daha əvvəl özünün rəsmi Telegram kanalında vasitəçilər tərəfindən təqdim olunmuş atəşkəs təkliflərini araşdırdıqlarını açıqlamışdı. Təkliflərin konkret məzmunu açıqlanmasa da, HƏMAS hər hansı razılaşmanın aşağıdakı şərtləri ehtiva etməli olduğunu bildirib: Qəzza zolağında atəşin tamamilə dayandırılması, İsrail qoşunlarının ərazidən çıxarılması və bölgəyə humanitar yardımın maneəsiz şəkildə çatdırılması.
Hazırda tərəflər arasında dolayı yolla danışıqlar davam edir və bu prosesə Misir, Qətər və ABŞ kimi vasitəçilər cəlb olunub. Razılaşmanın əldə olunması bölgədə uzun müddətdir davam edən hərbi qarşıdurmanın sona çatdırılması baxımından mühüm addım ola bilər.
Fidan Qarayeva
10:00 04.07.2025
Oxunuş sayı: 10587
