Çin Aİ-ni qarşıdurmadan uzaq durmağa çağırdı: “Avropanın problemləri Çinlə əlaqəli deyil”
Çin Xarici İşlər naziri Vanq Yi Avropa İttifaqını Çinlə münasibətlərdə qarşıdurmadan çəkinməyə və dialoq yolu ilə əlaqələri davam etdirməyə çağırıb. Bu çağırış, Aİ-nin Xarici Siyasət rəhbəri Kaja Kallasın Pekini Avropanın təhlükəsizliyini pozmaqda ittiham etməsindən sonra səsləndirilib.
Crossmedia.az bildirir ki, Vanq Yi çıxışında Avropanın üzləşdiyi müxtəlif çətinliklərin nə keçmişdə, nə indi, nə də gələcəkdə Çin tərəfindən yaradılmadığını vurğulayıb. O bildirib ki, Çin daim sabitlik və əməkdaşlıq tərəfdarı olub və Avropa ilə münasibətlərin qarşılıqlı hörmət və anlayış üzərində qurulmasına önəm verir.
Nazir həmçinin qeyd edib ki, Avropa və Çin arasında fikir ayrılıqları olsa da, bu fərqliliklər qarşıdurma üçün səbəb olmamalıdır. Vanq Yi Avropa İttifaqını üçüncü tərəflərin təsirinə düşmədən müstəqil və obyektiv xarici siyasət yürütməyə çağırıb. Pekin rəhbərliyi Avropa ilə əlaqələrin gərginləşdirilməsinin hər iki tərəfin maraqlarına uyğun olmadığını bəyan edib.
Mehriban Yariyeva
09:35 04.07.2025
Oxunuş sayı: 677
