“Anadolu Qartalı - 2025” beynəlxalq təlimi ilə bağlı mətbuat konfransı keçirilib
Türkiyədə keçirilən “Anadolu Qartalı - 2025” beynəlxalq təlimi ilə bağlı mətbuat konfransı təşkil olunub.
Crossmedia.az xəbər verir ki, Türkiyənin Konya vilayətində keçirilən konfransda hərbi pilot, general-mayor Mete Kuş təlimlə bağlı media nümayəndələrinə məlumat verib. General-mayor builki təlimin müasir, dinamik və çoxşaxəli əməliyyat mühiti əsas götürülərək planlaşdırıldığını və ilk dəfə müharibədən öncəki böhran mühitini əhatə edən ssenarilərin real uçuşlarla canlandırıldığını bildirib.
O qeyd edib ki, konvensional əməliyyat çərçivəsində keçirilən beynəlxalq təlimdə ilk dəfə yalnız pilotsuz uçuş aparatları (PUA) birbaşa bombardmançı rolunda iştirak edib.
Bildirilib ki, builki təlimə 30-u beynəlxalq, 45-i yerli olmaqla, ümumilikdə, 75 hava və dəniz vasitəsi, eləcə də 1000-dən çox şəxsi heyət qatılıb.
Brifinqdən sonra jurnalistlər onlar üçün ayrılmış sahədə Türkiyə, Azərbaycan, Qətər, Macarıstan, İordaniya, Səudiyyə Ərəbistanı, ABŞ və NATO-ya məxsus hava qüvvələrinin enmə və qalxış manevrlərini, Türkiyə Hərbi Hava Qüvvələrinin “Türk ulduzları”nın nümunəvi uçuşunu izləyiblər.
20:48 03.07.2025
Oxunuş sayı: 5734
