HƏMAS atəşkəs zəmanəti istəyir, qəzzada tələfat artır
HƏMAS ABŞ-nin yeni atəşkəs təklifinin müharibənin sonuna gətirib çıxaracağına zəmanət istəyir. İsrailin Qəzza zolağındakı hücumları nəticəsində cümə axşamı 59 nəfər həlak olub.
Crossmedia.az xarici mediaya istinadən bildirir ki, İsrail rəsmiləri atəşkəs və girovların azad edilməsi ilə bağlı razılığın mümkün olduğunu bildirir. ABŞ Prezidenti Donald Tramp İsrailin 60 günlük atəşkəs şərtlərini qəbul etdiyini deyib. Lakin HƏMAS müharibənin tam bitməsi üçün təminatlar tələb edir.
Misir və Qətər vasitəçiləri ABŞ və beynəlxalq zəmanətlər almağa çalışır. İsrail HƏMAS-dan cümə gününə qədər cavab gözləyir və müsbət cavab olarsa, dolayı danışıqlar başlayacaq.
Təklifə görə, mərhələli şəkildə 10 israilli girov azad ediləcək, 18 meyit qaytarılacaq, qarşılığında isə fələstinli məhbuslar sərbəst buraxılacaq. Hazırda 50 girovdan 20-si sağdır.
Qəzzada isə vəziyyət ağırdır. Həkimlərin bildirdiyinə görə, humanitar yardım məntəqəsinə gedən 20 nəfər İsrail atəşi nəticəsində öldürülüb, məktəbə zərbədə isə 17 nəfər həyatını itirib. İsrail ordusu bunun cavab tədbiri olduğunu açıqlayıb.
Fatimə Nəbiyeva
19:59 03.07.2025
Oxunuş sayı: 6541
