Çində çaylar daşdı: 10 bölgədə sel təhlükəsi elan olundu
Çində aramsız yağan yağışlar nəticəsində bir neçə çayın səviyyəsi rekord həddə çatıb. Bu səbəbdən ölkənin 10 əyalət və bölgəsində sel təhlükəsi ilə bağlı xəbərdarlıq edilib. Yerli hakimiyyət orqanları əhalini ehtiyatlı olmağa çağırıb, müdafiə tədbirlərinin gücləndirilməsi tapşırılıb.
Crossmedia.az xarici mediaya istinadən bildirir ki, xüsusilə Çinin cənub-qərbində yerləşən ərazilərdə, çərşənbə günündən cümə axşamı səhərinədək 6 çayın səviyyəsi təhlükəli həddi keçib. Bu çaylar arasında Sıçuan bölgəsindəki Quanyuan şəhərindən keçən Qiaozuanq çayı da var. Həmin ərazidə 1981-ci ildən bəri ən güclü sel qeydə alınıb.
Sıçuan və Qansu əyalətlərindən axan Jialin çayının qolları, eləcə də Heyluncianq əyalətində yerləşən Hulan çayı da əvvəlki tarixi rekordları geridə qoyaraq daşqınlara səbəb olub. Suyun səviyyəsinin bu dərəcədə artması ətraf yaşayış məntəqələri üçün ciddi təhlükə yaradıb.
Hebey, Xizan və Ninsya bölgələrinə ani sel, torpaq sürüşməsi və bəndlərin partlaması riskinə görə xüsusi xəbərdarlıqlar göndərilib. Rəsmi qurumlar əhalini təhlükəli əraziləri tərk etməyə və xəbərdarlıqlara ciddi əməl etməyə çağırıb.
Qansunun Tienşui şəhərində baş verən torpaq sürüşmələri əsas yolların bağlanmasına səbəb olub. Xüsusilə Honqbu qəsəbəsində 3600 kubmetr həcmində torpaq kütləsi avtomobil yolunu tamamilə örtüb. Hadisə ilə əlaqədar bölgəyə fövqəladə hallar üzrə mütəxəssislər və texnika cəlb olunub.
Fatimə Nəbiyeva
19:18 03.07.2025
Oxunuş sayı: 714
