ABŞ Ukraynaya silah tədarükünü dayandırdı – siyasi təzyiq iddiaları ortadadır
ABŞ hakimiyyəti Ukraynaya göndərilən bütün silah tədarüklərini – o cümlədən mərmilər və ehtiyat hissələrini – dayandırıb. Məlumatı ukraynalı rəsmilər yayıb.
Crossmedia.az “The Economist” nəşrinə istinadən bildirir ki, Kiyev bu addımı Vaşinqtonun Ukraynadan siyasi güzəştlər əldə etmək cəhdi kimi qiymətləndirir. Xatırladaq ki, mart ayının əvvəlində ABŞ Prezidenti Donald Trampla Ukrayna Prezidenti Vladimir Zelenski arasında canlı yayımda yaşanan mübahisədən sonra ABŞ bir müddət silah tədarükünü və kəşfiyyat əməkdaşlığını dayandırmışdı. Ukrayna tərəfi hesab edir ki, bu yeni qərar da həmin siyasətin davamıdır.
Lakin ABŞ rəsmiləri Ukraynaya qarşı hər hansı siyasi təzyiq göstərildiyini və silah tədarükünün tamamilə dayandırıldığını inkar edirlər. ABŞ Müdafiə Nazirliyinin (Pentaqon) baş sözçüsü Şon Parnell bildirib ki, silah çatdırılmaları davam edir, lakin o, bu barədə ətraflı məlumat verməyib. Pentaqon isə bu “pauzanın” ABŞ-nin hərbi hazırlığını və müdafiə prioritetlərini qorumaq məqsədi daşıdığını bəyan edib.
Bu hadisə Ukrayna üçün çətin dövrdə baş verir. Ölkə Rusiyaya qarşı mübarizədə ABŞ-nin hərbi dəstəyinə böyük ehtiyac duyur. Silah tədarükündə yaranan fasilə həm cəbhədə, həm də beynəlxalq siyasi arenada Ukraynanın mövqelərinə təsir göstərə bilər. ABŞ və Ukrayna arasında mövcud olan strateji əməkdaşlığın gələcəyi isə bu hadisələrin fonunda qeyri-müəyyən olaraq qalır
Fidan Qarayeva
18:47 03.07.2025
Oxunuş sayı: 8726
