İran: “Nüvə proqramımızı dayandırmaq tələbi ilə aparılan danışıqlar mənasızdır”
İran Avropa ölkələrinin Tehranı dinc məqsədli nüvə proqramından imtina etməyə məcbur etmək cəhdlərini pisləyib. İranın Xarici işlər naziri Abbas Əraqçi xəbərdarlıq edərək bildirib ki, belə yanaşma ilə aparılan hər hansı danışıqlar “mənasız” hesab olunacaq.
Crossmedia.az xarici mediaya istinadən bildirir ki, İran rəsmisi bu açıqlamanı Avropa İttifaqının xarici siyasət üzrə rəhbəri Kaja Kallasın İranın nüvə proqramının "bitirilməsi" məqsədilə danışıqların tez bir zamanda bərpa olunması çağırışına cavab olaraq verib. Əraqçi X sosial platformasında paylaşdığı açıqlamada qeyd edib ki, əgər JCPOA (Birgə Hərtərəfli Fəaliyyət Planı) Birgə Komissiyasının Koordinatoru düşünürsə ki, danışıqların məqsədi İranın nüvə proqramını sona çatdırmaqdır, bu zaman Avropa İttifaqı və onun üzv dövlətlərinin, o cümlədən Böyük Britaniyanın danışıqlardakı iştirak və rolunun “əlaqəsiz və mənasız” olacağı anlamına gəlir.
Əraqçi vurğulayıb ki, İranın dinc məqsədlərlə nüvə proqramı inkişaf etdirmək hüququ beynəlxalq hüquqla təmin olunur və bu hüquqdan imtina etməyə məcbur edilmək İran üçün qəbuledilməzdir. Rəsmi Tehran, nüvə proqramının yalnız enerji istehsalı və tədqiqat məqsədi daşıdığını bəyan edərək, Qərb ölkələrinin bu məsələ ilə bağlı təzyiqlərini siyasi motivli və qeyri-konstruktiv hesab edir.
Hazırda İranla Qərb arasında nüvə məsələsində gərginlik artmaqda davam edir və tərəflər arasında yeni danışıqların olub-olmayacağı sual altındadır.
Fidan Qarayeva
17:55 03.07.2025
Oxunuş sayı: 9954
