Azərbaycan saytlarının Rusiyada bloklanması dövlət səviyyəli senzura nümunəsidir - AÇIQLAMA
Son günlər Azərbaycanın tanınmış xəbər portallarına, xüsusilə də “Global Media Group”a daxil olan “Report.az”, “Oxu.az” və “Caliber.az” kimi saytlara Rusiyanın müxtəlif şəhərlərindən girişin mümkün olmaması media ictimaiyyətində ciddi suallar doğurub. Məsələnin texniki nasazlıqdan qaynaqlandığı iddia edilsə də, vəziyyətin miqyası və təkrarlanması bu addımın məqsədli və siyasi xarakterli ola biləcəyini göstərir. Məsələyə münasibət bildirən ekspertlər bu halı informasiya azadlığına qarşı yönəlmiş koordinasiyalı bir bloklama kimi dəyərləndirir və Azərbaycanın media resurslarının Rusiya daxilində məhdudlaşdırılmasının arxasında Kremlin informasiya siyasətinin dayandığını düşünürlər.
Bu barədə Crossmedia.az-a danışan Azərbaycan Mətbuat Şurasının sədr müavini, Medianın İnkişafı Agentliyinin Müşahidə Şurasının üzvü Vüqar Zifəroğlu bildirib ki, Azərbaycan xəbər portallarına — xüsusilə “Global Media Group”a məxsus “Report.az”, “Oxu.az”, “Caliber.az” kimi saytların Rusiyanın müxtəlif şəhərlərində əlçatan olmaması ilk baxışdan texniki problem kimi təqdim oluna bilər: "Lakin məsələnin miqyası və spesifikliyi göstərir ki, bu, daha çox hədəfli məhdudlaşdırma (yəni filtrasiya və ya bloklama) ehtimalını gündəmə gətirir. Xatırlatmaq istərdim ki, bundan əvvəl də "Global Media Group"a məxsus saytlara hücumlar olmuşdu və bu hücumların arxasında məhz rusiyalı "haker qruplari"nın durduğu ilə bağlı informasiyalar var idi. Belə ki, Kremlin informasiya təhlükəsizliyi siyasəti çərçivəsində Rusiya ərazisində "düşmən informasiya platformaları" kimi dəyərləndirilən saytlar tez-tez bloklanır".
V.Zifəroğlu həmçinin, son günlər baș verən proseslərin fonunda Azərbaycan mediasının da bu çərçivəyə salına biləcəyini qeyd edib: "Belə ki, saytlara girişin yalnız texniki yox, koordinasiyalı şəkildə, müxtəlif rigionlarda eyni vaxtda məhdudlaşdırılması, haqlı olaraq bu addımın siyasi sifarişlə həyata keçirildiyi qənaətini yaradır. Görünən budur ki, Rusiya dövləti öz vətəndaşlarının xarici mənbəli məlumatlarla təmasda olmasına, yəni alternativ xəbər qaynaqlarından alınan bilgilərlə tanış olmaqlarına getdikcə daha sərt yanaşır. Bu ifadə azadlığına və informasiya əldə etmək hüququna birbaşa müdaxilədir. Birmənalı şəkildə vurğulamalıyıq ki, Rusiya daxilində yaşayan azərbaycanlıların, o cümlədən rusdilli oxucuların öz ölkələrinin media resurslarına çıxışının qarşısının alınması, dővlət səviyyəli senzura nümunəsidir".
Onun sözlərinə görə, bu hal yalnız texniki məsələ deyil, həm də siyasi və informasiya azadlığı ilə bağlı narahatedici siqnaldır.
Fatimə Məmmədova
15:48 03.07.2025
Oxunuş sayı: 1288
