“Rusiyadan istəyimiz vətəndaşlarımızın və soydaşlarımızın hüquqlarına hörmətlə yanaşmasıdır” - Deputat
Son dövrlərdə Rusiya ilə Azərbaycan arasında baş verən hadisələr, xüsusilə də informasiya məkanında və diplomatik müstəvidə müşahidə olunan gərginliklər fonunda, Rusiya Xarici İşlər Nazirliyinin “Azərbaycanla münasibətlərimiz strateji müttəfiqlik xarakteri daşıyır” bəyanatı diqqət çəkir. Bu açıqlama, Moskvanın Bakı ilə münasibətləri yenidən tənzimləmək və mövcud gərginliyi yumşaltmaq cəhdi kimi qiymətləndirilə bilər. Bəs Rusiya bu açıqlama ilə nəyə nail olmaq istəyir – münasibətləri bərpa etmək, yoxsa baş verən proseslərin məsuliyyətindən yayınmaq üçün görüntü yaratmaq? Məsələ təkcə diplomatik ritorika deyil, həm də regionda baş verən geosiyasi dəyişikliklərin fonunda Moskvanın yeni davranış modelinə keçid cəhdidir.
Mövzu ilə bağlı Milli Məclisin deputatı Aydın Mirzəzadə Crossmedia.az-a açıqlama verib:
“Rusiya rəsmisinin Azərbaycanla bağlı verdiyi bəyanatda müttəfiqlik məsələsini önə çəkməsi təqdirəlayiq bir haldır. Azərbaycan da Rusiya ilə müttəfiqlik əlaqələrini saxlamağa çalışır. Bizim min illik qonşuluq tariximiz var və vaxtilə bir dövlətin tərkibində olmuşuq. Bu gün mehriban qonşuluqdan başqa seçim ola bilməz. Azərbaycan Rusiya ilə həm beynəlxalq hüquq normalarına həm də maraqlara qarşılıqlı hörmət prinsipi ilə yaşayır. Bu gün bizim Rusiyadan gözləntimiz ayrı-ayrı insidentlərə qarşı Rusiyanın öz mövqeyini ortaya qoymasıdır. Bunlar AZAL-ın vurulmuş təyyarə ilə bağlı məsələnin sona çatdırılması və Yekaterinburqda Azərbaycan vətəndaşlarına qarşı zorakılığın araşdırılması və cəza verilməsi. Azərbaycan Rusiyanın daxili işlərinə qarışmır, ayrı-ayrı istintaq işinin gedişinə müdaxilə etmir. İstədiyimiz ancaq vətəndaşlarımızın və soydaşlarımızın hüquqlarına hörmətlə yanaşılmasıdır”.
Ayhan
15:45 03.07.2025
Oxunuş sayı: 10217
