Ermənistanda Konstitusiya İslahatları üzrə Şuranın iclası iki həftəyə keçiriləcək
Ermənistanda uzun fasilədən sonra Konstitusiya islahatları üzrə Şuranın ilk iclası iki həftə ərzində baş tutacaq. Bu barədə ölkənin ədliyyə naziri Srbuhi Qalyan hökumət iclasından sonra jurnalistlərə açıqlama verib. Ermənistan mediasının yaydığı xəbərə görə, nazir yeni Konstitusiya mətninin təqribən 10 ay ərzində hazır ola biləcəyini bildirib. Lakin Qalyan qeyd edib ki, bu müddət müzakirələrin gedişatından asılı olacaq və layihənin ictimaiyyətə açıq şəkildə müzakirəyə çıxarılması mümkündür.
Crossmedia.az xarici mediaya istinadən bildirir ki, Srbuhi Qalyanın sözlərinə görə, konstitusiya layihəsi hələ hazırlanma mərhələsindədir və əsas konseptual məsələlərin müzakirəsi gözlənilir. Yalnız bu müzakirələrdən sonra sənəd ictimaiyyətə təqdim olunacaq. Nazir əlavə edib ki, bu proses zamanı layihəyə ciddi dəyişikliklər edilməsi istisna olunmur. O həmçinin vurğulayıb ki, Müstəqillik Bəyannaməsinə mümkün düzəlişlər də gündəmdədir və bu məsələ də ayrıca müzakirə olunacaq.
Qeyd edək ki, mart ayının sonunda Ermənistanın baş naziri Nikol Paşinyan 2027-ci ildə yeni Konstitusiyanın qəbul olunması ilə bağlı referendum keçirməyi planlaşdırdıqlarını bəyan etmişdi. O zaman Paşinyan komandasının bəzi üzvlərinin referendumun 2026-cı ildə keçiriləcək parlament seçkiləri ilə eyni vaxtda keçirilməsinin məqsədəuyğun olduğunu düşündüklərini də bildirmişdi. Baş nazir vurğulamışdı ki, Konstitusiyanın dəyişdirilməsi daxili siyasət məsələsidir, lakin bu, regional və beynəlxalq təsirlərdən kənarda qala bilməz. Aprel ayında isə Paşinyan parlamentdə çıxışı zamanı yeni Konstitusiyada Müstəqillik Bəyannaməsinə istinadın yer almamalı olduğunu qeyd etmişdi.
Fidan Qarayeva
14:21 03.07.2025
Oxunuş sayı: 716
