ABŞ Zəngəzur dəhlizi təşəbbüsündə Rusiyanı kənarda saxlayır
ABŞ prezidenti Donald Trampın administrasiyası Zəngəzur dəhlizinin beynəlxalq nəzarət mexanizmi ilə bağlı yeni təşəbbüslə çıxış edib. Bu təşəbbüsə əsasən, dəhlizdə neytral zəmanətçi kimi Amerika kommersiya şirkətinin iştirakı nəzərdə tutulur. Söhbət Azərbaycanın materik hissəsi ilə Naxçıvan Muxtar Respublikasını birləşdirəcək quru yolunun idarə olunmasından gedir.
Crossmedia.az xarici mediaya istinadən bildirir ki, CaucasusWarReport “Carnegie Endowment for International Peace” fonduna istinadla yazır ki, hazırlanan plana əsasən, Zəngəzur dəhlizindən keçən yüklərin tranzitinə ABŞ-nin logistik şirkəti nəzarət edəcək. Eyni zamanda, bütün tərəflər bu nəqliyyat əməliyyatları ilə bağlı məlumatlara çıxış əldə edəcəklər.
Təşəbbüsün əsas məqsədi Azərbaycanın təhlükəsizlik təminatları ilə bağlı tələblərini qarşılayaraq, Ermənistanın dəhliz üzərindəki suverenliyini qoruyub saxlamaqdır.
Layihənin diqqətçəkən məqamlarından biri isə Rusiyanın həm danışıqlardan, həm də dəhlizin reallaşdırılmasından tamamilə kənarlaşdırılmasıdır. Bu, Moskvanın Cənubi Qafqazdakı azalan təsirinə bir işarə kimi qiymətləndirilir.
Bəzi müşahidəçilərin fikrincə, məhz bu səbəbdən Rusiya regionda prosesləri pozmağa və həm Ermənistanı, həm də Azərbaycanı qeyri-sabitliyə sürükləməyə cəhd edir. Vaşinqton isə Moskvanın zəifləyən mövqeyini fürsət kimi dəyərləndirərək, bölgədəki güc balansını dəyişmək istəyir.
Mehriban Yariyeva
10:28 03.07.2025
Oxunuş sayı: 8815
