Ukrayna ABŞ-yə xəbərdarlıq etdi: “Yardımın dayandırılması Rusiyanı ruhlandırır”
Ukrayna Xarici İşlər Nazirliyi, ABŞ Müdafiə Nazirliyinin bəzi hərbi mühimmatların göndərilməsini dayandırması qərarına etiraz olaraq, ABŞ-nin Kiyevdəki diplomatik nümayəndəsini nazirliyə çağırıb.
Crossmedia.az xarici KİV-ə istinadən xəbər verir ki, nazirlikdən verilən məlumata görə, ABŞ Missiyası rəhbərinin müavini Con Ginkel ilə keçirilən görüşdə, ABŞ-nin dəstəyinə görə minnətdarlıq bildirilib. Bununla yanaşı, Ukrayna Xarici İşlər nazirinin müavini Marianna Betsa, xüsusilə hava hücumundan müdafiə sistemləri üzrə yardımların kəsilməsinin Rusiyanı daha da ruhlandıra biləcəyini vurğulayıb.
Betsa qeyd edib ki, Ukraynanın müdafiə qabiliyyətinə dəstəyin gecikdirilməsi və ya təxirə salınması, əksinə, müharibəni və terroru davam etdirmək istəyən təcavüzkarın əlinə fürsət verir.
Ukrayna Müdafiə Nazirliyi isə ABŞ tərəfindən mühimmatların sevkiyatının dayandırıldığına dair rəsmi bildiriş almadığını açıqlayıb. Nazirlik, məsələnin aydınlaşdırılması üçün amerikalı həmkarları ilə telefon danışığı tələb etdiyini bildirib.
Ukrayna Prezident Administrasiyasının müşaviri Dmitro Lytvyn də vəziyyətin hələ tam aydın olmadığını, lakin yaxın günlərdə aydınlaşacağını deyib.
Kreml isə ABŞ-nin bu qərarını müsbət addım kimi qiymətləndirib. Moskva bildirib ki, Kiyevə daha az silah göndərilməsi münaqişənin daha tez sona çatmasına töhfə verə bilər.
Xatırladaq ki, ABŞ Müdafiə Nazirliyi, aparılan daxili araşdırmalar nəticəsində bəzi silahların ehtiyatlarda azalma səbəbilə Ukraynaya göndərilməyəcəyini açıqlamışdı.
Mədinə Cəlilova
05:00 03.07.2025
Oxunuş sayı: 952
