Tramp Administrasiyası Rusiyaya qarşı sanksiyaları müvəqqəti yumşaldıb
ABŞ, 19 dekabr 2025-ci il tarixinədək Rusiyanın əsas qurumlarına qarşı tətbiq olunan bəzi sanksiyaları müvəqqəti olaraq dayandırıb.
Crossmedia.az xəbər verir ki, bu barədə "The New York Times" məlumat yayıb.
Məlumata görə, qərar çərçivəsində xüsusilə mülki nüvə sahəsində məhdud əməkdaşlığa icazə verilib. Eyni zamanda ABŞ, Macarıstana Rusiyanın “Paxş” Atom Elektrik Stansiyası ilə bağlı ödənişlər həyata keçirməsinə razılıq verib. Bu məqsədlə ABŞ Rusiya və Macarıstan üçün lisenziyaların müddətini ilin sonuna qədər uzadıb.
Ödənişlərin “Rosatom”a beynəlxalq maliyyə sistemi vasitəsilə həyata keçiriləcəyi bildirilir.
Bundan başqa, Rusiya Yakutiyada yerləşən nadir metal yataqlarının ABŞ ilə birgə işlənməsi imkanlarını nəzərdən keçirir. Bu isə enerji və strateji resurslar sahəsində ikitərəfli əməkdaşlıq potensialının artdığını göstərir.
Tramp administrasiyasının son yumşaltma qərarlarından sonra Rusiya kompüter ehtiyat hissələri, mikrosxemlər və çiplər də daxil olmaqla yüksək texnologiyalı məhsulların idxalını artırıb. ABŞ bu kateqoriyaya aid texnologiyaların Rusiyaya ixracına dair tətbiq edilən bəzi məhdudiyyətləri də yumşaldıb.
Ekspertlər bu addımların siyasi və iqtisadi nəticələrinin yaxın aylarda daha da aydınlaşacağını bildirirlər.
23:30 02.07.2025
Oxunuş sayı: 838
