Ermənistan hökuməti “Elektrik Şəbəkələri”ni ələ keçirməyə hazırlaşır
Ermənistanın Baş naziri Nikol Paşinyan “Elseti Ermənistan” QSC-də siyasi intriqalarda iştirak edən bütün işçilərin işdən çıxarılacağını bildirib. Şirkət Rusiyada yaşayan erməni əsilli oliqarx Samvel Karapetyana məxsusdur.
Crossmedia.az xəbər verir ki, bu barədə CNN məlumat verib.
Paşinyan həmçinin xəbərdarlıq edib ki, “Ermənistanın Elektrik Şəbəkələri” (ESƏ) əməkdaşlarını Samvel Karapetyanı dəstəkləyən mitinqlərə qatılmağa məcbur edən şəxslərə qarşı sərt tədbirlər görüləcək.
“Kim ki əməkdaşları mitinqlərə getməyə vadar edir, onlar da cəzalandırılacaq,” – deyə baş nazir Facebook paylaşımında qeyd edib. O əlavə edib ki, yalnız işinə sadiq qalan və təzyiqlərə boyun əyməyən işçilər üçün heç bir problem olmayacaq. Hətta bu cür şəxslər işdən çıxarılsa belə, iyul ayında işlərinə bərpa ediləcək və maaşları veriləcək.
Bununla yanaşı, Ermənistan parlamenti “Elektrik Şəbəkələri”nin dövlət mülkiyyətinə qaytarılmasına imkan verən qanun layihəsini birinci oxunuşda qəbul edib. Layihənin lehinə 65 deputat səs verib, 30-u isə əleyhinə çıxıb.
Qanun dəyişikliyinə əsasən, hökumət enerji sahəsindəki şirkətlərin fəaliyyətində pozuntu aşkar etdikdə onların idarəçiliyinə müdaxilə edə və zərurət yaranarsa, onların satışını tələb edə biləcək. Dövlət həmin hallarda üstün satınalma hüququna sahib olacaq.
Xatırladaq ki, “Ermənistanın Elektrik Şəbəkələri” Samvel Karapetyana məxsusdur. O, 2025-ci il iyunun 17-də Yerevanda həbs olunub. Bu hadisədən sonra Ermənistan hökuməti şirkətin dövlətləşdiriləcəyini açıqlayıb.
Nigar Rəhimova
01:00 03.07.2025
Oxunuş sayı: 7173
