Yenidən doğulacağam, amma bu qərarı Çin yox, biz verəcəyik
Tibet ruhani lideri Dalay Lama 90 illiyi ərəfəsində verdiyi açıqlamada ölümündən sonra yenidən doğulacağını təsdiqləyib. O bildirib ki, bu proses yalnız onun təsis etdiyi Gaden Phodrang Fondu tərəfindən həyata keçiriləcək.
Crossmedia.az xəbər verir ki, CNN-ə istinadən yayımlanan açıqlamada Dalay Lama yenidən doğuluşun Çinin deyil, tibet buddistlərinin daxili qərarı olduğunu vurğulayıb. Onun sözlərinə görə, varisi Çin ərazisində yox, “azad bir dünyada” doğulacaq və bu şəxs istənilən millətdən və ya cinsdən ola bilər.
Bu bəyanat birbaşa Pekinə mesaj kimi dəyərləndirilir. Belə ki, Çin hökuməti yeni Dalay Lamanın onların nəzarətində həyata keçirilən “qızıl urna” mərasimi ilə müəyyən olunmalı olduğunu iddia edir.
Ekspertlər bu açıqlamanın gələcəkdə iki fərqli Dalay Lamanın biri Çin tərəfindən, digəri isə sürgündəki tibetlilər tərəfindən tanınmasının mümkün olduğunu bildirirlər.
Xatırladaq ki, hazırkı Dalay Lama 1959-cu ildə Çin ordusunun Tibetə müdaxiləsindən sonra Hindistana mühacirət edib və bu günə qədər orada – Dharamşalada sürgündə yaşayır. Onun bu qərarı Tibet dini irsinin siyasi təsirlərdən uzaq şəkildə davam etməsinə xidmət edir.
Qeyd edək ki, beynəlxalq insan haqları təşkilatları və bir sıra ölkələr, o cümlədən ABŞ və Hindistan, Çin hökumətinin Tibet üzərindəki nəzarətini tənqid edir və Dalay Lamanın öz varisini seçmək hüququnu tanıyır.
Nigar Rəhimova
23:10 02.07.2025
Oxunuş sayı: 8425
