Danimarka qadınlar üçün də hərbi xidmətə çağırışı məcburi etdi
Danimarka hökuməti 2025-ci il iyulun 1-dən etibarən qadınlar üçün də məcburi hərbi xidmət tətbiqinə başlayıb. Bu dəyişikliklə ölkə tarixində ilk dəfə olaraq qadınlar da kişilər kimi hərbi çağırış sisteminə daxil ediləcək.
Crossmedia.az xəbər verir ki, bu barədə CNN məlumat verib.
Yeni qaydalara əsasən, iyulun 1-dən sonra 18 yaşına çatan qadınlar hərbi qiymətləndirmə günlərində iştirak etməli və xidmət üçün lotereya sisteminə daxil olmalıdırlar. İndiyə qədər qadınlar yalnız könüllü şəkildə orduya qoşula bilirdilər.
Danimarka bu qərarı Avropada artan təhlükəsizlik təhdidlərinə cavab olaraq qəbul edib. Rusiya ilə bağlı artan narahatlıqlar, eləcə də NATO çərçivəsində müdafiə imkanlarının gücləndirilməsi zərurəti bu dəyişikliklərin əsas səbəbləri kimi göstərilir.
2026-cı ildən etibarən hərbi xidmət müddəti hazırkı 4 aydan 11 aya qədər uzadılacaq. Hədəf isə 2033-cü ilə qədər hərbi xidmətə çağırılanların sayını 5 mindən 7,500-ə çatdırmaqdır.
Hərbi sahədə gender bərabərliyini təmin etmək üçün barraklar və avadanlıqlar yenilənir. Qadınlar üçün uyğun ölçüdə formalar və çantalar hazırlanır. Rəsmilər logistika və potensial ayrı-seçkilik məsələlərinin tədricən həll ediləcəyini bildiriblər.
Qeyd edək ki, Danimarka bu addımı ilə Norveç və İsveçdən sonra qadınlar üçün məcburi hərbi xidmət tətbiq edən üçüncü NATO ölkəsi oldu.
Nigar Rəhimova
22:15 02.07.2025
Oxunuş sayı: 8069
