Xamenei: “İranın təslim olmasını gözləmək absurddur”
İranın ali rəhbəri Əli Xamenei ölkəsinin xarici güclərə boyun əyməsinin mümkün olmadığını bəyan edib. O, bu fikri iyunun 30-da sosial media platforması “X” hesabında paylaşdığı açıqlama ilə ifadə edib.
Crossmedia.az xarici mediaya istinadən bildirir ki, Xamenei paylaşımında İranın qədim sivilizasiyaya sahib olduğunu və milli irs baxımından bir çox dövlətləri geridə qoyduğunu vurğulayıb. “İran milləti böyük millətdir, İran güclü və böyük ölkədir, ölkənin qədim sivilizasiyası var. Mədəni və sivilizasiya irsimiz Amerika kimi ölkələrdən yüz dəfələrlə zəngindir” – deyə ali rəhbər qeyd edib.
O, bəyanatında İranın digər dövlətlərə təslim olacağı ehtimalını ciddi tənqid edib. Xameneyinin fikrincə, bu cür yanaşmalar nəinki reallıqdan uzaqdır, hətta ağıllı insanlar tərəfindən istehza ilə qarşılanacaq qədər gülüncdür: “İranın başqa bir ölkəyə təslim olmasını gözləmək, müdrik insanların gülünc vəziyyətə salacağı absurd və səhv bəyanatlardan biridir”.
Xameneinin bu açıqlaması son günlərdə İranın geosiyasi mövqeyi və xarici təzyiqlərlə bağlı müzakirələrin fonunda diqqət çəkib. Onun sözləri ölkənin müstəqillik və milli qürur prinsiplərindən geri çəkilməyəcəyini bir daha nümayiş etdirib.
Fatimə Nəbiyeva
09:24 01.07.2025
Oxunuş sayı: 8922
