ABŞ-nin müdafiə strukturları İranın mümkün kiberhücumları ilə üz-üzədir
ABŞ-nin Kibertəhlükəsizlik və İnfrastruktur Təhlükəsizliyi Agentliyi (CISA) ölkənin müdafiə sənayesi şirkətlərini İranın potensial kiberhücumlarına qarşı ehtiyatlı olmağa çağırıb. Agentliyin bəyanatında qeyd olunub ki, xüsusilə İsrailin tədqiqat və müdafiə sahəsindəki şirkətləri ilə əlaqələri və ya payları olan müdafiə podratçıları daha yüksək risk altındadır. Qurum ABŞ-nin kritik infrastruktur obyektlərinin də bu təhdidlər fonunda ayıq-sayıq davranmalı olduğunu vurğulayıb.
Crossmedia.az xarici mediaya istinadən bildirir ki, CISA-nın sənədində hazırda İrana aid edilə biləcək genişmiqyaslı, əlaqələndirilmiş kiber kampaniya əlamətlərinə rast gəlinmədiyi qeyd olunur. Lakin Agentlik İranın kiberməkan üzərindən potensial zərərli fəaliyyətlərinin istisna olunmadığını bildirib. Bu səbəbdən ABŞ-da xüsusilə müdafiə sahəsində çalışan şirkətlərə, o cümlədən beynəlxalq tərəfdaşlarla əlaqələri olan qurumlara qarşı diqqətli davranmaq tövsiyə olunur.
Qeyd edək ki, son illərdə İranın müxtəlif ölkələrə qarşı həyata keçirdiyi kiberhücumlar beynəlxalq təhlükəsizlik dairələrinin diqqət mərkəzindədir. ABŞ rəsmiləri bu kimi hücumların yalnız texnoloji sahəyə deyil, həm də milli təhlükəsizlik və müdafiə gücünə təsir göstərə biləcəyini bildirirlər.
Fatimə Nəbiyeva
09:16 01.07.2025
Oxunuş sayı: 5771
