BMT: Qəzzada humanitar yardıma çatmağa çalışan 580 nəfər həlak olub
BMT Qəzza zolağında hökm sürən ağır humanitar vəziyyətlə bağlı son məlumatları açıqlayıb.
Crossmedia.az-ın xarici KİV-ə istinadən verdiyi xəbərə görə, BMT-nin Baş katibinin Yaxın Şərq üzrə müavini Xalid Xiari Təhlükəsizlik Şurasında çıxışı zamanı bildirib ki, iyunun 17-dən bəri İsrail və ABŞ-nin rəhbərlik etdiyi Humanitar Yardım Fonduna və yardım konvoylarına çatmağa çalışan azı 580 fələstinli həyatını itirib.
Onun sözlərinə görə, təxminən 80 gün ərzində İsrail tərəfindən Qəzzaya nə humanitar, nə də kommersiya yardımının daxil olmasına icazə verilməyib. Son günlər müəyyən yardımın bölgəyə daxil olması isə ehtiyacları qarşılamaqdan uzaqdır.
“Qəzzada humanitar yardıma çatmağa çalışan fələstinlilərin öldürülməsi və yaralanması bizi dərin narahat edir. Bu hallar qətiyyətlə qınanmalıdır. Hadisələrlə bağlı dərhal və müstəqil araşdırma aparılmalı, məsul şəxslər cavab verməlidir”, - deyə Xiari qeyd edib.
BMT rəsmisi əlavə edib ki, təşkilat insanlıq, qərəzsizlik, müstəqillik və ayrı-seçkiliyin olmaması kimi fundamental prinsiplərinin pozulduğu heç bir yardım mexanizmində iştirak etməyəcək.
X.Xiari beynəlxalq hüquq normalarına uyğun olaraq, İsrailin Qəzzaya humanitar yardımın maneəsiz və sürətli şəkildə çatdırılmasına şərait yaratmasının vacibliyini xüsusi vurğulayıb.
Aybəniz Səfərova
20:13 30.06.2025
Oxunuş sayı: 8477
