Suriya İsraildən qoşunlarını cənubdan çıxarmağı tələb edir
Suriya hakimiyyəti İsrailin ölkənin cənubundan hərbi qüvvələrini çıxarmasını tələb edir. Eyni zamanda, Dəməşq İsrailin Baş naziri Benyamin Netanyahu ilə Suriyanın yeni lideri Əhməd əş-Şaraa arasında görüş ehtimalını da istisna etmir.
Crossmedia.az xarici mediaya istinadən bildirir ki, adının açıqlanmasını istəməyən suriyalı mənbənin sözlərinə görə, İsrail və Suriya arasında əlaqələrin qurulması çox mühüm nəticələrə yol aça bilər. Mənbə qeyd edib ki, Suriya tərəfi İranla və onun bölgədəki müttəfiqləri olan “Hizbullah”, “İslam Cihadı” və HƏMAS təşkilatlarına qarşı çıxış edir.
Suriyalı mənbənin açıqlamasına əsasən, hazırda əsas tələb İsrail qoşunlarının Suriyanın cənubundan çıxarılmasıdır. O bildirib ki, mübahisəli olan Colan təpələri ilə bağlı məsələ bu mərhələdə ümumiyyətlə müzakirə olunmur:
“Colan təpələri məsələsi bu günlərdə gündəmdə deyil. Bu barədə danışmaq hələ tezdir. Lakin bu prosesdə ABŞ əsas amil olaraq qalır”.
Digər tərəfdən, Suriyanın yeni lideri Əhməd əl-Şəara ilə Benyamin Netanyahu arasında görüşün BMT Baş Assambleyasının Nyu-Yorkda keçiriləcək iclasında baş tutması da mümkündür. Bundan əlavə, yaxın gələcəkdə Səudiyyə Ərəbistanının vəliəhd şahzadəsi Məhəmməd bin Salmanın Dəməşqə ilk rəsmi səfəri üçün hazırlıqlar aparılır.
Fatimə Nəbiyeva
10:39 30.06.2025
Oxunuş sayı: 7461
