Ermənistanda hökumət və kilsə arasında gərginlik pik həddə çatıb
Erməni Apostol Kilsəsinin arxiyepiskopu Mikael Açapaxyan hökuməti devirmək məqsədilə çağırışlar etməkdə ittiham olunaraq saxlanılıb.
Crossmedia.az TASS agentliyinə istinadən xəbər verir ki, arxiyepiskopa qarşı Ermənistan Cinayət Məcəlləsinin 422-ci maddəsinin 2-ci hissəsi üzrə (hakimiyyətin devrilməsi məqsədilə açıq çağırış) cinayət işi açılıb. İstintaq orqanları onun barəsində həbs-qətimkan tədbirinin seçilməsi üçün məhkəməyə müraciət ediblər. Məhkəmənin 24 saat ərzində qərar verməsi gözlənilir.
Açapaxyan ona qarşı irəli sürülən ittihamları rədd edib. Onun vəkili Ara Zoqrabyan yerli mediaya açıqlamasında ittihamın hüquqi əsaslara söykənmədiyini bildirib.
Xatırladaq ki, iyunun 28-də Eçmiədzin şəhərində yerləşən Bütün Ermənilərin Katolikosunun iqamətgahında hüquq-mühafizə orqanları arxiyepiskopun saxlanılması məqsədilə əraziyə daxil olarkən din xadimləri və dindarlarla qarşıdurma yaşanıb.
Müqəddəs Eçmiədzin yaydığı bəyanatda 27 iyunu Ermənistanın müasir tarixi üçün "milli rüsvayçılıq günü" adlandırıb.
Bildirilib ki, arxiyepiskopun saxlanılması kilsəyə qarşı həyata keçirilən sistemli təzyiqlərin davamıdır.
Qeyd edək ki, Ermənistanın Baş naziri Nikol Paşinyanla ölkənin dini rəhbərliyi arasında münasibətlər son illərdə xeyli gərginləşib. 2020-ci ildə Müqəddəs Eçmiədzin Paşinyanın Qarabağ siyasətinə etiraz edərək onun istefasını tələb etmişdi. Sonrakı dövrdə hökumət və kilsə arasında qarşılıqlı ittihamlar və açıq qarşıdurmalar baş verib.
Bundan əlavə, iyunun 25-də Ermənistan İstintaq Komitəsi “Müqəddəs Mübarizə” hərəkatının lideri, arxiyepiskop Baqrat Qalstanyanı hökuməti devirmək məqsədilə terror aktları planlaşdırmaqda ittiham edərək, onun barəsində iki aylıq həbs qətimkan tədbiri seçib.
Hazırda arxiyepiskop M.Açapaxyanın həbs olunub-olunmayacağı ilə bağlı qərarın yaxın vaxtlarda elan olunacağı gözlənilir.
Aybəniz Səfərova
23:09 29.06.2025
Oxunuş sayı: 810
