Suriya Prezidentinə sui-qəsd cəhdinin qarşısı alınıb
Türkiyə Milli Kəşfiyyat Təşkilatı (MİT) və Suriya xüsusi xidmət orqanları Suriya Prezidenti Əhməd Şaraya qarşı planlaşdırılan sui-qəsd cəhdini zərərsizləşdirib.
Crossmedia.az xarici mediaya istinadən xəbər verir ki, İranla koordinasiyalı şəkildə fəaliyyət göstərən, Livan “Hizbullah”ına bağlı bir qrup şəxs Dəraa əyalətində Əhməd Şaraya qarşı sui-qəsd planlaşdırarkən ələ keçirilib.
Məlumata görə, son dövrdə prezidentə qarşı ən azı iki sui-qəsd cəhdi ifşa olunaraq önlənib. Sui-qəsd planlarının arxasında əsas motiv kimi İranın Suriyada azalan təsirini bərpa etmək cəhdləri dayanır.
Qeyd edilir ki, devrilmiş keçmiş prezident Bəşər Əsədin dövründə İranın İnqilab Keşikçiləri Korpusuna məxsus qruplar və “Hizbullah” Suriyada geniş fəaliyyət imkanına malik idi. Lakin onun hakimiyyətdən uzaqlaşdırılması ilə İranın regiondakı logistik dayaqları ciddi şəkildə zəifləyib.
Siyasi müşahidəçilərin fikrincə, Ə.Şaranın dialoq və diplomatiyaya əsaslanan siyasəti Tehranla münasibətlərdə məsafəli mövqeyini qoruyub saxlayır. Bu səbəbdən İran tərəfinin Suriyada yenidən özünə yaxın qüvvələri hakimiyyətə gətirmək istəyi sui-qəsd cəhdlərini stimullaşdıran əsas faktorlardan biri hesab olunur.
Əməliyyatın detallarına dair əldə olunan məlumatlara görə, Ə.Şaranın təhlükəsizlik komandası potensial təhdidlərə qarşı yüksək hazırlıq vəziyyətindədir və mümkün çevriliş və ya sui-qəsd ssenarilərinin qarşısını almaq üçün qabaqlayıcı tədbirlər həyata keçirir.
Xatırladaq ki, Əsəd rejimi devrildikdən sonra Dəməşqə səfər edən ilk xarici yüksək vəzifəli şəxs Türkiyə Milli Kəşfiyyat Təşkilatının rəhbəri İbrahim Kalın olub.
Bu fakt Ankara administrasiyasının Əhməd Şara rəhbərliyi ilə açıq və strateji dəstəyinin göstəricisi kimi qiymətləndirilir.
Aybəniz Səfərova
20:59 27.06.2025
Oxunuş sayı: 9802
