Tədqiqatçı-mütəxəssisin “Gürcü dili" kitabı nəşr olunub: “Nənəm həvəsləndirdi”
Beynəlxalq Münasibətlərin Təhlili Mərkəzinin əməkdaşı, Gürcüstan üzrə mütəxəssis Nəsibə Mirzəyevan “Gürcü dili" kitabı nəşr olunub.
Crossmedia.az xəbər verir ki, bu barədə müəllif özü bildirib.
“Qürur hissi ilə bildirməliyəm ki, üzərində 5 ilə yaxındır çalışdığım "Gürcü dili" kitabının nəşri artıq işıq üzü gördü. Ölkəmiz üçün xırda mənim üçünsə böyük olan bu işin ərsəyə gəlməsinin bir sıra səbəbləri var idi. 2020-ci ildən etibarən Bakı Dövlət Universitetinin Qafqazşünaslıq ixtisasında "Gürcü dili" fənnini tədris etməyim mənim qarşımda bu dili "daha asan, maraqlı, effektiv necə izah etmək olar" sualını qoydu. Lap əvvəldən də marağım olduğu üçün illərlə gürcü dilinin fərqli suallarına cavab axtarmağım bu iş üçün münbit əsasa çevrildi. Ən önəmlisi və çətini isə kitab yazmaq yox, onu daha oxunaqlı etmək, öz doğma dilimizlə qarşılaşdırmaq və oxucuya sanki onunla danışırammış kimi təqdim etmək idi. Bu məqsədə çata bildimmi onu oxucularım deyəcək”.
Tədqiqatçı bildirib ki, nənəsi onu bu kitabı yazmağa həvəsləndirib: “Ona məni xarici dillərə həvəsləndirdiyi üçün ayrıca minnətdaram. Sayəsində bir sıra dilləri öyrənmişəm. Həmçinin kitabıma rəy verməsi üçün müraciət etdiyim dəyərli şəxslərə böyük minnətdarlığımı bildirirəm, xüsusilə də elmi redaktorum olan gürcü filologiyası üzrə mütəxəssis, ədəbiyyatşünas, tərcüməçi Oqtay Kazımova (Oktai Kazumovi) . Oqtay müəllimin işinin çoxluğuna rəğmən sona kimi yazımı oxuyub tövsiyələrini verməsi mənim üçün olduqca sevindirici idi. Kitab gürcü dili ilə maraqlanan şəxslər, Qafqazşünaslıq ixtisasında təhsil alan və ya bu sahəyə həvəsi olanlar üçün nəzərdə tutulub. Tezliklə də mağazalarda olacaq”.
Kənan Novruzov
19:38 27.06.2025
Oxunuş sayı: 9758
