Netanyahunun məhkəmə prosesinin təxirə salınması tələbi rədd edilib
İsrail Baş Prokurorluğu Baş nazir Benyamin Netanyahunun korrupsiya ittihamları üzrə məhkəmə prosesinin iki həftəlik təxirə salınması ilə bağlı müdafiə tərəfinin müraciətini qəbul etməyib.
Crossmedia.az-ın İsrail mediasına istinadən verdiyi xəbərə görə, prokurorluğun yaydığı rəsmi bəyanatda qeyd olunub ki, təqdim olunan əsaslandırmalar, o cümlədən yay tətili mövsümünün yaxınlaşması dinləmələrin təxirə salınması üçün yetərli hüquqi əsas yaratmır.
Netanyahunun vəkilləri müraciətdə həm beynəlxalq və regional proseslərə, həm də ABŞ Prezidenti Donald Trampın məhkəmə işləri ilə bağlı ictimai açıqlamalarına istinad ediblər. Lakin Baş Prokurorluq bu arqumentlərin məhkəmə prosesinin gedişatına təsir etmədiyini vurğulayıb.
Qeyd edək ki, B.Netanyahu rüşvət, dələduzluq və etimadı sui-istifadə maddələri üzrə açılmış cinayət işi çərçivəsində uzun müddətdir məhkəmə araşdırmalarına cəlb olunub.
Aybəniz Səfərova
19:45 27.06.2025
Oxunuş sayı: 10093
