Erməni apostol kilsəsinin arxiyepiskopu istintaqa könüllü ifadə verməyə hazırlaşır
Ermənistan Apostol Kilsəsinin Şirak yeparxiyasının rəhbəri, arxiyepiskop Mikael Açapaxyan barəsində irəli sürülmüş ittihamla bağlı istintaq orqanlarına könüllü ifadə vermək niyyətindədir.
Crossmedia.az xəbər verir ki, bu barədə məlumatı Eçmiədzin Ana Monastırının Xarici Əlaqələr və Protokol İdarəsinin direktoru, arxiyepiskop Natan Hovannisyan verib.
Onun sözlərinə görə, Kilsənin qəbul etdiyi qərara əsasən, Açapaxyan yaxın günlərdə Yerevana gələrək Ermənistan İstintaq Komitəsinə müraciət edəcək.
Xatırladaq ki, ötən gün hüquq-mühafizə orqanları Eçmiədzində – bütün ermənilərin katolikosunun iqamətgahına müdaxilə edərək Açapaxyanı saxlayıb aparmağa cəhd göstəriblər. O, həmin vaxt orada keçirilən Ruhani Şura iclasında iştirak etmək məqsədilə monastıra gəlmişdi.
N.Hovannisyanın sözlərinə görə, arxiyepiskopa istintaq orqanlarına çağırılması ilə bağlı hər hansı rəsmi bildiriş təqdim olunmayıb. Buna baxmayaraq, o, vəziyyətin daha da gərginləşməməsi üçün hüquq-mühafizə orqanlarına könüllü müraciət etmək qərarı verib.
18:34 27.06.2025
Oxunuş sayı: 9417
