Liderlərin dueli: Ərdoğan bu hərəkəti ilə Makrona yerini göstərdi - Bədən dili mesajı
Siyasi liderlər həm də öz bədən dilləri ilə mesaj verirlər. Bu mənada Türkiyə Prezidenti Rəcəb Tayyib Ərdoğanla fransalı həmkarı Emmanuel Makron arasında "duel" diqqət çəkir. Dövlət başçəları xüsusilə son zamanlar, demək olar, bütün görüşlərində bədən dilləri ilə mesajlar verirlər. Bu baxımdan onların son görüşü- Niderlandda keçirilən NATO liderlərinin toplantısı çərçivəsində bir araya gəlmələri diqqət çəkir. Ərdoğan ona əl uzadan Makronun əlini sıxır və onu özünün solundan sağa çəkir. Yelisey Sarayının rəhbəri isə təbəssüm edir və müqavimət göstərmir.
Bakı Dövlət Universitetinin Sosial Elmlər və Psixologiya fakültəsinin müəllimi, psixologiya üzrə fəlsəfə doktoru, dosent Müşviq Mustafayev onların bu davranışlarını Crossmedia.az-a şərh etdi:
"Ərdoğanla Makronun qısa görüşü və birgə foto çəkilişi zamanı ilk olaraq nəzərə çarpan odur ki, Türkiyə lideri görüşə bir qədər arxayın və özünəinamlı bir duruşla daxil olur. Onun addımları yavaş, lakin məqsədyönlüdür. Bu tipik olaraq yüksək status və daxili sabitlik göstəricisidir".
Makron isə bir qədər gərgin görünür. Onun göz kontaktı yaratmağa çalışması və əlini uzatması, sosial nəzakəti qorumağa yönəlik bir jestdir, lakin bu jestin icrasında özünü üstün göstərmək istəyindən çox, tarazlıq yaratmaq arzusu hiss olunur".
M.Mustafayev görüşdə baş tutan maraqlı anı belə dəyərləndirib: "Ən diqqətçəkən məqam isə foto çəkilişi zamanı Ərdoğanın Makronun çiyninə toxunaraq onu belə demək mümkünsə, yerinə yönəltməsidir. Bu tip fiziki təmaslar, xüsusilə də çiynə yüngül toxunuşlar, dominantlıq və istiqamətvermə jestidir. Yəni, Ərdoğan burada həm fiziki, həm də simvolik olaraq "mən yön verirəm" mesajı ötürür. Makronun bu toxunuşa cavab olaraq reaksiyasız qalması və yüngülcə gülümsəməsi onun həmin anı diplomatik "udma"ğa çalışdığını göstərir. Bu, situativ təslimiyyət və adaptasiya davranışıdır. Ümumilikdə psixoloji baxımdan bu qarşılıqlı münasibət status, güc münasibətləri və liderlərin şəxsiyyət tipləri haqqında xeyli ipucu verir. Ərdoğanın bədən dili məkan və zaman üzərində nəzarəti əlində saxlamağa çalışan lider tipini göstərir. Makron isə görünən diplomatik gülümsəmə və qeyri-verbal boyun əymə ilə, münasibətdə daha çox uyğunlaşan tərəf kimi görünür".
Fatimə Nəbiyeva
12:02 27.06.2025
Oxunuş sayı: 1161
